Wir Graff Hans Purgraff zu^e Maydbu^erch vnd Graff zu^e Hardekk wir bechennen mit dem brief, daz fu^er vns chomen sind der Prior von Wilhering vnd der Pharrer von Teras vnd derselbig Pharrer hat daz bechent vnd geoffent vor vnsern genaden, daz er auf dy czehent vnd auf dy güter nichtz cze sprechen hat dy weil er lebt, noch woll in chein i^errung darin tuen weder an den vorgescriben gulten noch czehenten, auzgenomen dez czehent, der gelegen ist ze Teraz in dem dorf, vmb daz selb schullen dy herren von Wilhering den Pharrer ze Teraz dez der geczen vnd vnverdarben behalten vnd darvmb so schol er in auch Raten vnd helfen, daz pest daz er mag. vnd der selbig Prior pat vns vleizzig durich got vnd durich vnser vrawn willen, daz wir der vorgescriben gueter ir herr vnd scherm weren vnd sew nimant entweren lazzen chvftichleich (!) an Recht vnd daz selbig hab wir im gelobt mit vrchunt dez priefs versigelt mit vnserm anhangvnden Jnsigel vnd mit dez erberen herren des Stayner dew weil official ze Wyen, der der sach Rychter ist gewesen von dez Pischolfs wegen anhangvnden Jnsigel. Der prief ist gegeben nach Christi gepu^ert drewczehen hvndert jar, darnach in dem LXXVIIIJ. jar an sand Jerigen tag.

Source Fulltext: OÖUB 9 (Wien 1906) S. 613