Ich Ulreich der Haemerl Purger ze Wienne vnd ich Wendelmu^eet sein Hausfrow vnd vnser erben, wier veriechen -, Daz wier mit gesampter Hant - vnd mit vnsers amptmans hant bru^eder Hainreichs ze den zeiten Hofmaister vnd amptman ze Chalnperig verchauft haben zway phunt wienner pfenninge geltes pu^erchrechtes auf vnserm pavngarten gelegen dacz chalnperig in der Aw^o zunachst Jacobs paungarten dez glaich, vnd do man alle iar von dient von dem egenanten vnsern pawmgarten ze dem gotshaus vnser vrowen ze Nevnburchk chlosterhalben dreizzichk wienner phenninge an sand Merteinstag ze gruntrecht vnd nicht mer, die vorgenanten zway phunt wienner phenninge geltes pu^erchrechtes haben wir Recht vnd redleichen verchauft vnd geben mit alle de nu^etze vnd rechten vmb sechczehen Phunt wienner phenninge der wir gar vnd gancz gewert sein, Dem Erbern geistleichen Herren Abpt Johannes vnd der Samnv^enge gemain dez Chlosterz ze Wilheringe fürbaz ledichleichen vnd freyleichen ze haben, vnd allen iren frvmen do mit ze schaffen mit verchauffen, mit versetzen vnd geben, wem se wellen, alz in daz aller pest fu^egunde ist, Vnd also mit ausgenomen warten, daz wir vnd wer den vargenanten vnsern Pawmgarten noch vns inne hat, den Herren von Wilhering die vargenanten zway phunt wienner phenning geltes purchrechtes fürbaz alle iar do von diennen schullen ze zwain zeiten im Jar ain phunt wienner phenninge an dem vaschang tag vnd ain phunt wienner phenninge an sand Jorigen tag. Tuen wir des nicht. So schullen wir ins dor nach immer vber virzehen tag gestevn mit der zwispilt mit alle dem nütze vnd rechten. alz ander purchrecht dienst recht ist in dem Lande ze Österreich. Vnd sein auch wier vnd vnser erben vnuerschaidenleichen der vorgenanten zwayr phunt wienner phenninge geltes purchrechtes der Herren von Wilhering der Samnůng gemain Recht gwer vnd scherm var aller ansprach alz purchrechtes recht ist vnd dez Landez recht in O^esterreich. Waer aber daz in der zwayr phunt geltes an dem vargenanten vnserm pavmgarten icht abget, daz schullen se haben, dacz vns vnd vnuerschaidenleich auf allem vnserm guet, daz wir haben in dem Lande ze O^esterreich, wir sein lemtichk oder töde. Wir haben auch recht vnd freybal alle iar abzelösen, welhes iar wir mu^egen oder wellen. zainzigen. oder mit einander immer ain phunt geltes mit acht phunten wienner phenninge vnd mit ainem phunt phenning ze dienst dorauf, oder sechczehen phunt phenning mit einander vnd zway phunt phenninge ze dienst dor auf vnd swenne daz geschiecht, So ist vnser pavmgarten danne furbaz wider ledichk vnd frey an allen chrieg var aller ansprach, Vnd daz die sach also staet vnd vnczerbrochen weleib, vnd wend wir selb nicht aigen insigel enhaben, Dor vber ze ainem warn v^erchunde geben wir in den brief, versigilt mit dez Erbern Chorherren insigil Hern Petreins ze den zeiten obrister Chelner dez Gotzhaus vnser vrouen ze nevnburch chlosterhalben, im an schaden, den vnser amptman bru^eder Hainreich die zeit Hofmaister ze Chalnperg dor vmb ze einem zeug peten hat, wend er selb nicht aygen insigil enhat. dez ist auch zeug mit seim insigil der Erber Man Peter der Maennseber purger ze Nev^onburchk, den wir dez auch fleizzichleich peten haben. Der prief ist geben noch christi gepurde dreůzehen Hundert Jar dornach in dem nevn vnd sibenczigistem Jar, dez Ma^entages nach dem prechen Tag.

Source Fulltext: OÖUB 9 (Wien 1906) S. 561-562