Ich Gorg Widmer, genant der Purrer vergich fur mich und all mein erben und fur Hennslein den/ Widmer, meinn brüder, für den ich mich gantz und gar angenomen hab, und tün kund offenleich/ mit dem brieve allen den, die in lesent oder hörnt lesen, das wir mit wolbedachtem muet und/ gutem willen zu der zeit, do wir es wolgetun mochtten, recht und redleich aufgeben haben unserm/ lieben vettern U/olreichen dem Widmer, burger ze Wels unser lehen mit aller zugehorung ze holtz,/ ze veld und sunderleich mit dem zehent auf demselben lehen und das gelegen ist ze Prait(e)n-/ wisen in Waldarer pharr und ist ze lehen von der grafschafft ze Schawnberg; das benannt/ lehen haben wir aufgeben wissentleich mit krafft des gegenwu/orttigen briefs dem vorbenanten/ unserem vettern, allen seinn frumen damit zeschaffen, mit verkauffen, versetzen, wie im das aller pest/ fugt an all unser irrung, das loben wir im bey unsern trewn ales ste/atzehaben, als vor an dem/ brief geschriben stet, der geben ist ze Wels under meim anhangunden insigl nach krists/ gepurd tausent vierhundert darnach in dem zehennden jar an montag nach sandlarentzen tag.