Wir Leonart von gotes genaden bischove zu Passaw bekennen offentlich mit disem brief, das fur uns kame der ersame unser lieber in gote/ abbt zu Wilhering, sant Bernharts orden unsers bistumbes und bracht uns fur unsers lieben herren und vorvordern bischoff Jorgen zu Passaw seligen/ brief, seinem gotzhaus und vorvordern uber ettlich freyunge gegeben, der hirinne begriffen ist von wort zu wortte also lauttund: Wir Jorig von/ gotes genaden bischove zu Passaw bekennen und tun kund offenlich mit dem brief, als unser vorvordern bischoven zw Passaw seliger gedechtnusse/ die erbern geistlichen unser lieb andechtig den abbt und gotzhaus zw Wilhering, sand Bernharts orden unsers bistumbes solhe genade getan/ und freyheit gegeben haben, das si jerlich ain pfund weits saltz mautfrey und an alle furvart frey furen mugen auf der Tunaw und auf dem In/ an unsern mautten ze Passaw und zu Obernperg, als das alles in der selben unserer vorvordern briefen, die si darumbe haben aigentlich begriffen/ ist, haben wir angesehen ir lautter andacht und durch gotes willen in und dem benanten irm gotzhaus die obgenanten genade und freyheit also/ bestett und bestetten in auch die wissentlich mit dem brief; davon gepieten wir unsern getrewen lieben, unserm mauttern ze Passaw und ze/ Obernperg, die gegenburttigklich seinn oder in kunftigen zeiten werden, das si den obgenanten abbt und gotzhaus bei den selben genaden und freyungen/ beleiben lassen und dawider nicht tun noch gestatten zetun in chainer weise, wanne wir das gar ernstlich meynen mit urkunt des briefs geben zu/ Ebelsperg an sand Angnesen tage nach christi gepurde viertzehenhundert iare und in dem funften iare. Bate uns der selbe abbt an seiner und/ seins convents stat diemutigklich, das wir in sollich freyunge und genade genedigklich geruchtten zu bestetten, wanne wir nu von unserer bischoflichen/ wirden und ambts wegen pflichttig und schuldig sein die manigvelltigklichen zefurdern, die stetlich in dem dienst des almechtigen gotes streben, auch/ angesehen ire diemutige und fleissige bete, darumbe mit guter wissen, haben wir dem obgenanten abbt und seinem convent solh privilegii und freyheit/ bestett und bestetten die auch wissentlich in kraft ditz briefs, davon gebieten wir unsern lieben getrewen, unsern mauttern zu Passaw und zu Obern-/ perg, die yetzund sind oder kunftig werden, das si den obgenanten abbt und gotzhaus bei solhen unsern freyheiten und genaden ungehindert beleiben/ lassen und nichs dawider tun noch gestatten getan werden, das ist unser ernstliche meynunge mit urkunde des briefs versigillt mit unserm anhang-/ endem insigill. Geben in unserm gesloss Czelle an sambstage nachst nach unser lieben frawn schyedunge tag nach christi gepurde viertzehen-/ hundert und in dem neunundzwenitzigkisstem iaren.