Wir Abbt Ulreich ze Wilhering und der gancz convent daselbs veriehen und tun kund offenleich mit/ dem brief allen den, dy in horent, ansehent oder lesent, das wir mit wolbedacht[em] muet unverschaid-/ enleich verliehen und verchauft haben Jorigen dem Kramer, die zeit richter [zu Otenshaim], Dorothea/ seiner hawsfrawen und allen iren baiden eriben unsern gartten cze nachst bey dem [markt] Ottenshaim/ gelegen, den […] der Aigner vor inn gehabt hat zw einem rechten kaufrecht mit allen eren,/ rechtten, nuczen und gesuechen und von alltter darczu gehort und auch [als ez] herchomen ist umb ain gelt, des wir von in gancz gericht und gewert sein an alles vercziehen und an allen schaden in solich/ beschaiden, das sy, ir eriben oder wer den gartten von uns zelehen hat oder inne hat alle jarleich davon/ raichen und dien schullen zw rechtem dienst zw unser lieben frawn tag der dinstczeit ain pfunt/ wienner pfenig und zw sannd Jorgen tag ze purckrecht zwen und dreissig wienner pfennig und/ nicht mer. Sy sullen uns aber den gartten pawleich und wesenleich haldten, legen und lassen, damit/ wir unsers diensts wol darauf bechomen mügen, ob sy aber dez also nicht tetten und uns den/ obverschriben dienst und purckrecht jerleich ze der obgemelten zeit nicht ausrichtteten und den/ uber drey vierzehen tag versessen, so […] auf dem benantten gartten/ in unser gewalt verfallen und mügen da mit dem benantten gartten handeln und tuen nach allem/ unserm wolgevallen an aller ir widersprechen, irrung und hindernuss, auch ob sy ire rechtten woltten/ oder musstten verchauffen oder verseczen, wie sich das fueget so schullen [sy] uns vor anpieten, das/ abzelosen; wollten wir dann nicht losen, so mugen sy ire recht wol verchauffen oder verseczen, doch/ nur irm gleich und nach unserm rat und willen, anders es hiet khain chrafft und unverczigen/ unser rechtten als sy [oben] gemelt sind; das dy red und dy sache allso stet und unzebrochen bleibe/ daruber so geben [wir in] den brief besigeltten mit unsern baiden anhangunden insigel, der geben/ ist nach kristi gepurd vierczehen hundert jar darnach in dem siben und vier[czigisten] jare an/ suntag […].