Wir Chonrat, abbt zu Wilhering und der ganncz convent daselbs bekennen fur uns, unser nachkomen und tun kund offenleich/ mit dem brief allen lewten, dy in sehen oder horen lesen, das wir mit wolbedachtem muet unverschaidenlich miteinander verliehen haben/ dem Hannsen, weilent Ortnner zu Rewt, die zeit man zu Winkchel, Anna, seiner hawsfrawn und allen iren paiden eriben unser gut gelegen/ bei Rewt zu Talhaim in Schonheringer pfarr gelegen und diennt alle jar jerleich zu rechtter dienstzeit siben schilling wienner/ phennig und nicht mer; dasselb guet weilennt abbt Wilhalm unser lieber vatter und vorvoder lobleicher gedachtnuss zu rechtem kauf-/ recht auch verliehen hat mit allen den eren, rechten, nuczen so darzu gehorent oder davon bekomen mugen zu holcz, zu vel[d], zu wismad,/ zu dorff und von altter herkomen ist, umb ain gelt, des wir ganncz und gar gericht und gwert sein an allen schaden in solicher beschai-/ den, das sy und ir erben oder wer das gut inne und ze lehen hat, sol unser gwerttiger gehorsamer hold sein mit alle dem und/ recht ist, kain herrn noch schermb fur uns nemen noch haben oder sy [hietten] ire recht an dem egenantten gut verloren. Wir/ haben auch darauf noch lanndt recht, abfart, anlaidt, todrecht nach [dym] und es sich verwandelt und stewr, wann ander/ unser gotshaws holden […] not durfften dem gotshaws stewern und ander roboltten; sy sullen auch unser taiding suechen und/ vor unser zu recht sten umb all sach; es ist auch zumerkchen, ob der obgenant Hanns, Anna sein hawsfraw und all ir erben/ woltten oder musten ire recht auf dem egenantten gut verseczen, verkawffen, wie sich das ymmer fueget, so sullen sy uns die/ selben recht anpietten abzelosen; woltten wir dann der nicht, so mugen sew darnach ire rechtten mit unserm gutlichem/ willen verkauffen, geben und tu/en wie oder wemb sy wellen mit allen den eren, rechten, diensten und nuczen, als oben an dem/ brief gemelt ist, doch nur irm gleich und unengoltten unser gerechtikait, als sy oben an dem brief gemelt sind; das dew/ red und dy hanndlung also stat und unverkert bleib, daruber zu ainer ewigen gedachtnuss geben wir in den brief be-/ sigelten und wolbestatt mit unsern paiden anhanngunden innsigeln, geben nach kristi gepurd vierzehenhundert und in dem/ siben und sechszigistten jare an sambstag nach dem heiligen osttertag.