Ich Michel auff dem Hafelguet, henhalb der Trawn undter dem gotshaws zu Gleynkh diezeit gesessen und Thoman, des Froleich weilent/ auf dem Phluegel gut [zw Derrenpach] saligen sun bekenn fur mich, all mein erben und miterben und tun kund offenleich mit dem brief allen,/ den er furkumbt sehen, horen oder lesen, das ich mit gutem willen wolbedachtigkleich zu der zeit und weil, do ich das rechtleich an manigkleichs/ widersprechen wol getun mocht, verkawfft und zukawffen geben hab dy hawsrawmb und pawmans rechten, so dann mein benantter vater Thoman/ saliger auf dem benantten Phluegel gut gehabt und hindter sein lassen hat, dem erwirdigen geistlichen, meinen gnadigen lieben herrn herrn/ Chonratten, abbt zu Wilhering und seinem erwirdigem convent daselbs und allen iren nachkomen; ich hab in auch dy obverschriben hawsraw-/ mb und pawmansrecht auf dem benantten gut mit aller zugehorung abgetretten und eingeannttwurtt aus meiner, aller meiner erben und/ miterben nucz und gwer in ir gwalt, nucz und gwer mit aller statt, der sy durich recht daruber bedurffen, wissenleich mit krafft dez briefs und/ tun mich auch dez gancz [ab und] furzicht umb ain gelt, dez ich von in gannz und gar enntricht und gwert pin worden zu rechtter weil und zeit an/ allen schaden, also das sew nu furbasser sullen und […] haben, niessen und allen iren nucz und frumb damit zu betrachten, mit ver-/ seczen, verkawffen, schaffen machen, ain kawffrecht darauf geben, wemb sew dez verlusst, an unser und aller unser eriben auch manigkleichs/ von unsern wegen [ein]sprechen, irrung und hindernuss ungeverlich; ich obgenantter Michel, all mein erben und miterben sein auch darumb zu recht/ ir recht gweren und furstandt fur all krieg und rechtlich ansprach, alsdann solhs kawffs hawsrawmb und pawmans rechten dez gotshaus/ Wilhering und landes ob der Enns recht ist; gienng in aber daran icht ab, damit in krieg oder irrung darinn auferstunde, des sew/ zu schaden kamen, wie sich das fueget, dez nichtz ausgenomen, denselben schaden allen zusambt dem obgestimbten kawff und gwerschafft sullen/ und wellen wir in ganncz und gar erstatten, ausrichten und widerkeren und sullen sew dasselb allez haben und bekomen, dacz uns, unsern eriben/ und trewen und darzu unverschaidenlich auf all unserm gut, so wir inndert haben, gewinnen oder hindter unser lassen, darinn nichtz ausge-/ nomen; [dahin] sullen sew alle ire rechten, geistlich und weltlich ganncz und gar erlanngt und behabt und uns gegen in an aller statt mit/ dem […] [g]anncz [uncze]recht und verlorn, wo oder wie das furkumbt, alles trewlich und ungeverlich; und dez zu ainem waren/ urkund [gib ich in] den offen brief besigelten und wolbestatt mit dez edeln Gorig Harnner zu Ottenshaim und dez erbern Steffan Fleisch-/ hakcher, bu[rger] [und zu der] zeit einer des ratts daselbs zu Ottenshaim iren paiden anhangunden innsigeln, dy ich bestimbter Michel/ vleissigkleich [darumb] gepeten hab, doch in paiden und allen irn erben anschaden; darundter ich mich fur all mein erben und miterben mit/ mein trewn [in aides] weis vestigkleich verpindten, alles das war und statt zuhaltten, das der brief ausweist. Zewgen der sachen und/ gepet umb dy insigel sind dy ersamen her Hanns Zobel, pfarrer zu Sannd Petter, herr Leonhart Veyolhueber, pfarrer im Weissenpach,/ herr Sigmund Grafenawer, pfarrer in der Zwetel, herr Ulreich Awer, pfarrer zu Ottenshaim, herr Fridreich Hamersmid, pfarrer zw/ Lannfelden und ander frumber lewt genueg. Geschehn und geben nach kristi gepurdt vierzehen hundert und in dem siben und sechzi-/ gistem jare an freitag nach ambrosy des heiligen pischoff.