Ich Fridreich Hueber, weilent zu Wilhering an der portten wenund, bekenn fur mich, all mein erben und miterben, dy yecz lembtig sind oder/ noch hinfur kunftig werden, und tun kund offenlich mit dem brief allen, den er furkumbt sehent, horent oder lesent, das ich bei meinem wolvermugen/ wolbedachtigkleich mit gutem willen, meiner nachsten und pesten frawnt und erber frumber lewt ratt zu der zeit und weil, do ich das an manigkleichs/ einsprechen rechtlich wol hab getun mugen, recht und redlich verschafft und geben hab, schaff und gib auch wissenlich in krafft des briefs dem/ erwirdigen geistlichen herren, hern Chonrad, abbt zu Wilhering und dem erwirdigen convent daselbs, allen iren nachkomen und irem gotshaws unser/ lieben frawen daselbs zu Wilhering all mein hab und guet, wo ich das uberall inndert hab und gewinn, so ich mit tod abgee hindter mein lasse und was/ ich rechtlich und pilleich versparen mag, es sei varund, anligkund, phennig oder phenwert, im gotshaws oder ausserhalb dez gotshaws, des alles nichts/ ausgenomen fur all ander mein erben, miterben und frawnt, dy yeczo sind oder kunfttig werden; und ich hab das getan umb dy gross gnad und trew, dy sy mir/ beweist haben und haben mich furgesehen mit ainer aufrichtigen gnugsamlichen pfruntt nach inhaltt ains briefs, von in darumb ausgangen und umb meiner/ und meiner vorvodern und nachkomen seln hail willen, und das ich in ir tottenpuech eingeschriben und aller der gutatt, so dann in dem erwirdigen/ gotshaws beschiecht mugen tailhafftig werden, also in solicher beschaiden, das sy und ir nachkomen di selb hab und gut, so ich hinder mein lasse und wo ich/ dy uberal indert hab und lass, innerhalb oder ausserhalb dez gotshaws, wo sy darauf komen und zaigen sich derselben hab und gut undterwindten, eincziehen, das/ allez inne haben, prawhen, nuczn und niessen zu alln irn notdurfften und damit handeln und tun, wie sew dez verlust und gutzimbt an aller meiner eriben und/ miterben auch aller anderer meiner frawnt und manigkleichs einsprechen, irrung und hindernuss angever; wann das allez mein herttgewunnes und verdients/ ledigs gut gewesen ist und meinen erben und miterben auch allen meinen frawntten auch manigkleich nyeman anderer davon nichtz phlichtig und schuldig/ zu anttwurtten gewesen pin und ich bin auch umb all sach, was sich zwischen der obgenantten meiner gnadigen herren und mein vergangen und verlawffen/ hat bis her auf hewttigen tag umb jarsold umb all anderer spruch und vodrung, darinn nichtz gesundert noch hindan geseczt sunder das allez gannczleich/ hie inne beslossen, abgeschaiden, verraidt, ganncz geaint und gericht, treulich und ungeverlich; und was mein erben, miterben oder all anderer mein frawnt/ auch manigkleich anderer yemant von unsern wegen nach meinem abganngk icht spruch und ansuchung zu den benantten herren, allen iren nachkomen/ zu dem benantten irem gotshaws, allen iren lewtten und hindersassen vermaintten zu haben oder zutun und mit in dawider anerhueben kriegetten, recht/ tetten oder tetten, es wer mit geistlichem oder weltlichem rechten, da haben sy gegen in, iren nachkomen und gotshaws unrecht und ganncz verloren/ und sy haben dann gegen in recht erlanngt, behabt und ganncz gewunnen, wo der gegenwurttig brief furkumbt und gezaigt wirdet angever;/ ich obgenantter Fridreich Hueber bin auch darumb zu recht ir recht gwer und furstannd fur all krieg und rechtlich ansprach, alsdann solhs geschafts/ und lanndes ob der Enns recht ist. Gieng in aber daran icht ab damit in krieg und irrung darinn auferstunde, wie sich das ymmer fueget/ und begeb, dez sew zu schaden kamen, des nichtz ausgenomen, den selben schaden allen sullen und wellen wir in ganncz und gar erstatten, ausrichten und/ widerkeren und sullen sy dasselb alles haben, dacz mir, mein erben und trewen und darzu unverschaidenlich bekomen auf all unserem gut, so wir inndert/ haben, gewinnen oder hindter unserer lassen, darinn nichtz ausgenomen dochin solhen sy alle ire rechten, geistlich und weltlich, ganncz und gar er-/ lanngt und behabt und uns gegen in an aller stat mit dem aller ersten ganncz ungerecht und verloren, wo oder wie das furkumbt, alles trewlich und/ ungeverlich; des zu ainem waren urkund gib ich in den offen brief besigelten und bestatt mit des edeln vestten Veytten des Gnewssen, die/ zeit phleger zu Ottenshaim und der erberen weisen Anthoni Pechrer und Wolfgang Stadel, burger und baid diezeit dez erbern ratt zw Lyncz,/ iren anhanngunden innsigeln, dy ich obgenantter Fridreich vleissigkleich darumb gepeten hab, doch in, allen iren erben und innsigeln an schaden;/ darundter ich mich obestimbter Fridreich fur mich, all mein erben und miterben und all anderer mein frawnt mit mein trewen in aides weis verpindt,/ allez das war und stett zu haltten, das der gegenwurttig brief ausweist, der geben ist nach kristi gepurdt vierzehen hundert und in dem achtund-/ sechzigistem jare am phincztag vor dem heiligen palmtag.