Ich Thyman Wurmb, weilent auf dem Wurmbhof zu Oberndorf gesessen und ich Elspet, sein hawsfraw bekennen fur uns,/ all unserer erben und miterben, frawnt, helffer und gunner, yeczo lembtig oder noch kunfttig und tun kund offenlich mit dem brief allen,/ den er furkumbt sehent, horent oder lesent: Als wir den bestimbten Wurmb hof, dy hawsrawmb und pawmans rechten darauf und was mir/ mein gnadig herren von Wilhering daran und darauf und mir bestimbten Elspeten ains gmachts von gnaden nicht von rechtens wegen/ auch darauf und daran vergunet haben, wann derselb hof mit aller zugehorung des erwirdigen gotshaws Wilhering freys aigen/ und freye stifft ist, dennoch von gnaden wegen und nach vleissiger pett edler erber und weiser frumber lewt ratt haben uns dy ge-/ melten unser gnadig lieb herren abbt Chonrad zu Wilhering und der erwirdig convent daselbs vergunnet ain hawsrawmb und/ pawmansrechten darauf zuverkawffen; wir sein in und irem gotshaws auch schuldig worden versessens diensts ain namhafftte/ sum gelts, darinn sy uns mit merkchlichem nachlassen begnadt und gnadigkleichen dadurich habent komen lassen in solher weis/ und beschaiden, das wir uns des egenanten hoffs, seiner zugehorung und was wir vermaint haben daran zu haben, verczeihen hinfur/ ewigkleich mit dem brief wilkurnigkleich und unbetwunglichen mit gutem willen furzichttigklich, das wir, noch kain unserer erib/ noch anders nymant von unsern wegen dahin furbas kain recht, vodrung noch zuspruch nymer mer [haben oder gewinnen] sullen noch/ mugen mit recht noch an recht, geistlich noch weltlich, wie man das bedenkchen oder vinden mag, wenig oder vil angever; wir verichen/ auch, das wir umb all zwayung austtretten, das ich bestimbter Thoman von meinen gnadigen herren fluchtigkleich als ain/ fluchtiger hold getan hett, darumb sy mich in irerr pesserung und straffe in vankchnuss gehabt haben, veintschafft unwillen/ und wie sich das alles zwischen der bestimbten meiner gnadigen lieben herren und unser bis herauf den hewtigen tag vergangen/ und verlawffen hat, nichtz darinn ausgenomen noch hindan geseczt, mit unsern bestimbten gnadigen herren, irem gotshaws und convent/ mit iren diennern und amptlewtten und allen den iren auch allen den, dy in den sachen verdacht sein oder mochten werden trewlich und/ frawntlich ganncz verricht, verraidt und vertaidingt sein mit unserm willen und wissen nach unserm wolgevallen und vleissiger gepet,/ also das wir, all unserer erben, frawnt, helffer noch gunner, auch manigkleich anderer yemant von unsern wegen von aller vergangner sach/ und handel wegen hincz in kainen zuspruch, recht noch vodrung nymer mer haben an suchen sullen noch wellen mit wortten noch mit werchen,/ haimleich noch offenlich, das globen und gehaissen wir mit unsern trewen an aides stat und mit gesworen aid hincz got und dem heiligen/ statt und war zu haltten allez treulich und ungeverlich ob wir aber unsrer erbern oder anders yemant von unsern wegen das yndert uberfuren/ aller obverschribner pundt und arttikchel an dem brief ainen oder mer mit wortten oder mit werchen, haimlich oder offenlich, wo wir/ dann begriffen wurden, in welicher herschaft oder gerichtten, auf wasser oder auf lanndt, inner oder ausser lannds, derselben herschafft/ und richtter sey wir unsers leibs und guts an alle gnad vervallen und sullen uns darumb straffen und pessern, als sy stat an uns finden/ und sullen darinn frid, freyung noch gelayttes pan stet noch pan markcht noch kainerlai gepett nicht geniessen und des zu ainem/ waren urkund geben wir den brief besigelten mit der erbern weisen Chonradt Smidpintter und Hannsen des Stokchmaistterr,/ baid burger und diezeit des rates zu Ottenshaim iren paiden anhanngunden insigeln, dy wir obestimbte vleissigkleich darumb/ gepeten haben, doch in paiden und allen iren erben anschaden. Zewgen der sach und das man umb dy insigel gepeten hat sind:/ Der edel und vestt ritter herr Benedict Schifer von Freyling und dy erbern weis Vlreich Schafmair auffm Edrenspergk, Gorig/ zu Nidern Kaczing, Sigmund weilent Spatt zu Offthering, Vlreich Tanmair zu Tening, Jacob Widmer zw Nefaren, Wolfganng/ Obermair auffm Apprensperg, Sigmund Eystermair an der wis, Sigmund auf der Puechrewt, Thoman Perkchmair und/ Thoman zu Galparcz und ander erber lewt gnueg. Der brief ist geben nach kristi gepurdt vierzehen hundert und in dem/ newn und sechzigistem jare an suntag vor sannd veyts tag.