Ich Lienhart Munichmair, weilent auf dem Munichgut hindter dem erwirdigen gotzhaws Wilhering im Kamerampt/ gesessen, mit sambt mir mein hawsfraw Dorothea bekennen fur uns, all unser erben und tun kund offenlich mit dem/ brief allen, den er furkumbt sehent, horent oder lesent, das wir mit gutem willen und nach rat frumber lewt auf ain gancz stats ennd/ gericht und geaint sein mit dem erwirdigen geistlichem herren, herrn Chonrad, abbt zu Wilhering und dem convent daselbs umb/ alle dy zwittracht, zuspruch und vodrung und was sich zwischen der bestimbten unser gnadigen herren und unser allent-/ halben hat begeben und verlawffen biz her auf hewtigen tag, darinn nichtz ausgenomen, also das wir des benantten/ gutz, dacz dem Munichmair abtretten haben und haben in das ledigkleich aufgeben auss unser, aller unserer erben nucz/ und gwer in ir nucz und gwer und tun uns auch dez ganncz ab und furzicht in krafft des briefs, darumb uncz ain/ sum geltz von in ist gesprochen durich frumb erber lewt und getraid daran uns dann wol benueget hat, auch hinfur/ ain gut benugen haben sullen und wellen und dez wir ganncz und gar entricht und gwert sein worden zu rechtter weil und zeit/ an allen schaden; also das wir nu furbasser kain ansprach, zuspruch noch vodrung zu den bestimbten unsern gnadigen/ herren, irem gotshaws und lewten sunder zu dem obgenanten gut und gegen allen den, dy das hinfur inne haben und besiczen werden/ hinfur nymer mer haben sullen noch wellen, weder mit recht noch anrecht, geistlichem noch weltlichem rechten in kainerlay/ weis angever, wann wir dez nu hinfur allez verczigen sein und verzeihen und dez alles ymmer und ewigkleich in krafft/ dez gegenwurtigen briefs; sy mugen auch das nu wertter verseczen, verkauffen, verlassen oder kawfrecht darauf/ geben, wemb sy dez verlust und gutzimbt an all uns aller unser erben auch manigkleichs einsprechen irrung/ und hindernuss, allez treulich und ungeverlich; dez zu urkund geben wir in den offen brief mit der erbern weisen/ Vlreich von Kobergk, diezeit schreiber zu Wilhering, Hannsen dez Schartner und Vlreichen dez Leytner, diezeit amptman/ im Kamer ampt iren aufgedrukchten petschaften, dy wir vleissigkleich darumb gepeten haben, doch in und allen iren/ erben anschaden; darundter wir uns und all unser erben mit unsern trewen in aides weis vestigkleich verpindten, allez/ das war und stat zu halten ausweisung dez briefs, der geben ist nach kristi gepurdt vierzehen hundert und in dem/ newn und sechzigistem jare an suntag vor sannd thomas tag des heiligen zwelifpoten.