Ich Lienhart Nydermair auff dem Edreinsperig gesessen, ich Dorothea, des Vlreichen Holler zu Pasching hawsfraw, ich Margret des Hannsen Odmair zu Pasch-/ ing hawsfraw und ich Elspet, des Cristoffen Swartzlederer hawsfraw, alle geswistradt und Hannsen Angermair weylend auff dem Edreinsperig gesessen elich-/ ew kinder bekennen fuer unns, all unnser eriben, yetz lembtig oder hinfuer kunfftig, unnd thuen kund veraintlich mit dem offen brieff aller manigklichen,/ den er zu sehen, horen oder zu lesen furkumbt, das wir unns mit guettem willen wolbedachtigkleich unnd nach unnderweyssung unnser nagsten unnd/ pesten frewndt unnd annder erber lewtt rat, gunst unnd willen unnd mit wissen unnser obgenanntten mannen Vlreichen, Hannsen und Crisstoffen liep-/ pleich unnd frewntlich auff ain ganntz stats enndt geaint und gericht haben mit dem erwirdigen unnd geystlichen, unnserm genadigen lieben herrn, herrn/ Vrban, abbt unnser lieben frawn gotzhaws ze Wilhering, dem ganntzen convent daselbs, allen iren nachkomen und gotzhaws von wegen allder/ zuspruch, vordrung und gerechtigkait aines alten herkomen und pawmansrechten, so wir gehabt haben oder hinfur gehaben mochten ann dem/ Anngerhof auff dem Edransperig in Schonheringer pharr unnd im lanndtgricht Turnawtal gelegen, und ist des erwirdigen gotzhaws Wilhering/ freys aigen, inn solher beschaiden, das wir obgenante geswistradt, all unnser eriben und nachkomen, inner oder ausserhalb lanndes, auch manigklich annder/ yemant von unnser aller wegen zu dem egemelten unnser lieben frawn gotzhaws Wilhering, dem abbt unnd convent daselbs, allen iren nachko-/ men von des obenantten hoffs wegen der hawsrawmb und pawmansrechten darauff noch zu allen den, die den furan besitzen unnd innhaben wer-/ den, sunder auch von aller annderen varunden hab unnd guetz wegen, nichts ausgenomen, kain zuspruch, vodrung noch gerechtigkait hin-/ furr nymmer nicht mer haben versuechen sullen noch gewinnen wellen, weder mit geystlichen noch weltlichen rechten, noch anrecht, noch sunst in/ gar kainerlei weis hanndlung an alles gevar; wann unns darumb vonn denn bemelten herren unnd gotzhaws Wilhering ain ganntz vol-/ ligs benuegen mit ainer suma geltz beschechen ist, darann unns wolbenuegt hat und hinfuer ain guet benuegen haben wellen, der wir zu/ rechten tagen an allen schaden ganntz entricht und bezalt sein; darauff tuen wir unns […]stat unnser, aller unnser eriben, der egenantten/ zuspruch, vordrung und gerechtigkait auff dem egenantten hoff, aller zugehorung […] [haws]rawmb und pawmansrechten darauff auch/ aller varunden hab unnd guets wegen ganntze furzicht unnd verzeichen unns auch [wisse]ntlich in krafft des brieffs, also das der/ obenant unnser genadiger herr, abbt Vrban zu Wilhering, der conventt daselbs, [alle ire nachkomen] nwn hinfuer woll allen iren nutz/ unnd frumben damit hanndeln und betrachten mugen, als mit annderem irs gotzha[ws] [ai]genhafften unnd freyen guett, mit versetzen,/ verkawffen, verleichen unnd geben, wemb unnd wie sew verlust an unns der obenantten geswistradt aller unnser eriben unnd nachkomen/ auch an manigklichs vonn unnsernt wegen widersprechen, irrung, eintrag unnd hindernuss angevar; wuert aber wider solh obestymbt/ bericht von unns, unnseren eriben unnd nachkommen oder von wemb das von unnserent wegen beschach icht gehanndelt oder getan,/ es war inner oder ausser lanndes inn aim oder menigerem, wie sich das fueget, das der obenant herr Vrbann abbtt, sein conventt,/ ir nachkomen und gotzhaws Wilhering alle di iren oder di so den Anngerhoff besitzen schaden namen, wie die selben schaden genantt/ wurden, kainen ausgenomen, sullen sy, ir nachkomen zu unns, unnseren eriben unnd trewn darzu auff allem unnserem anligunden unnd va-/ runden guet, wo wir das haben, gewingen oder lassen, des nichtz ausgenomen sullen unnd mugen sew sich darumb woll so sy nagst/ mugen unnderwinden so lanng inne haben, nutzen, nyessen unntz inn umb abgannkch unnd schaden volligs benuegen beschiecht; das ist/ alles unnser guetter wille unnd wart, wir sein lembtig oder tod, getrewlich unnd unngevarlich; mit urkund des brieffs besigelt/ mit der edlenn erbernn unnd weyssen Anndre Lufftenekcher, diezeit lanndtrichter im Tuenawtall unnd Mathewsen Weyshover, an der/ zeit statrichter ze Everding der baider annhanngunden in sigel, dew wir mit unserem petbrieff mit vleis darumb gepetten ha-/ ben, doch inn, iren eriben unnd insigelln an schaden; darunnder wir unns obenanntte geswistradt Lienhart, Dorothea, Margrett unnd/ Elspet unnd fuer all unnser eriben verpinden wir unns mit unnseren trewn unnd ayden war unnd stat zuhallten innhalt des brieffs./ Geben ann phintztag sannd blasen tag nach christi geburd vierzehenhundert unnd inn dem achtczigisten jare.