Ich Jorig Startzer, mitburger zw Attenshaim, ich Margreth, sein hawsfraw, weilent Steffann Pfantzagel saligen/ tochter bekennen fur uns und unser chinder, auch an stat der hernach geschriben unser lieben frewnd Hannsen,/ Walthesaren, Sigmunden, Veitten, Pangratzen, Anna und Elspetten, geswistredt, weilent Wolfgangen Pfantzagel/ saligen chinder, auch Wolfgangen, Niclasen, Lienharten, Sigmunden, Jorigen, Steffann, Hannsen, Margrethen, Magdalen,/ alle newne geswistredt und Hannsen Schuester zw Kirchstetten saligen chinder, auch an stat Jorigen, Merten, Oster-/ man und Margrethen, alle viere geswistret und Micheln Weismair zw Tenning, Dorotheen seiner vordern haws-/ frawn eliche chinder, der aller verschriben volmachtigen gwalt wir haben und dafuer wir uns an nehmen, auch/ fuerall unser und ir eriben und thuen kund offenlich mit dem brieff allen, den er furkumbt, dye in sechent, horent/ oder lesent; als von aller zuespruch an vordrung und tzwitracht, so wir an stat unser und der vorgeschriben unser/ frewndt gesetzt und gehabt haben zw dem erwirdigen geistlichen herren, hern Thoman, abbt zw Wilhering/ und dem gotshaws daselbs von wegen andlichs und mueterlichs eribtails der hawsfrawmb und pawman-/ srechten des Anngerhoffs auffm Edransperg mit seiner zwgehorung, gelegen in Schonheringer pfarr und lanndt-/ gricht Tuenawtall, der des erwirdigen gotshaws Wilhering freye stifft ist, umb dy selbenn unser zwespr-/ uch und vordrung ober vernomen, hat sich der egemelt unser genadiger her von Wilhering lieblich und/ frewndlich nach ratt frumber erberger lewt mit uns verricht und geaint auff ain ganntz statz ennde, umb/ ain sumb pfennig, so uns darumb von im gesprochen worden ist, daran uns wolbenugt hat, und der sel-/ bem suma wir von im gantz und gar ausgericht und betzalt sein zw rechten tagen an allen schaden, dadu-/ rich so vertzeich wir uns, ich obgemelter Jorig Startzer und ich Margreth, sein hausfraw fur uns und unser/ chinder auch an stat der obgeschriben unser frewndt und all unser und ir eriben wissentlich in krafft des brieffs/ der maynung, das wir, unsre chinder, dy obgeschriben unsre frewndt, all unser eriben noch ander yemantz/ von unsern wegen nu hinfuer zw dem egenanten unserm genadigen herren von Wilhering, seinem gotshaws,/ all ieren nachkomen, noch auch zw allen den, so den Anngerhoff fuer an in haben und besitzen nymermer/ kain zuespruch, ansprach, eribschafft, gerechtigkait noch vordrung nit mer haben, ersuechen, gewingen sullen/ und wellen noch enmugen, weder mit recht, geistlich noch weltlich, noch anrecht, auch sunst in gar chainerlai/ weis, sunder der egenant unser genadiger her von Wilhering und all sein nachkomen mugen nu dy hawsra-/ wmb und pawmansrechten auff dem egemelten Angerhoff mit seiner zwgehorung verlassen, versetzen, verkawffen/ und damit hanndeln, als mit irem aigenhafften guet, wie sy verlust und guetzymbt an unser, unser eriben und/ menigklichs von unsern wegen widersprechen, einredt, irrung und hindernus; wurd aber uber solich bricht und/ vertzeichung von uns, unseren chindern den obgeschriben unseren frewndten, allen unseren und ieren eriben oder von wem das/ von unsern wegen beschach icht gehandelt oder gethan, es wa/er inner oder ausser lanndes, wie sich das fueget, als-/ dann bekennen wir dem egenanten herren von Wilhering, seinem gotzhaus und allen ieren nachkomen ain ersten/ furkomen behabt und gewungen und uns an allen endten ganntz unrecht und verloren wo der gegenburttig brieff/ furkumbt; na/emen sy des aber dar uber schaden, wie der genant macht warden, chainen ausgenommen sullen sy/ haben und bekommen zw uns den obgeschriben unseren frewndten allen unseren und ieren eriben, dar zw auff allem/ unserem anligundem und varundem guet, wo wir das uberall indert haben, gewingen oder lassen, darin nichtz/ ausgenommen, des mugen sew sich alsdann mit recht underwindten, inhaben, nutzen und niessen so lang untzt sy/ abgang und schaden da von einbekommen und benuegig gemacht sein, das ist unser gueter will und wort und/ mugen das nicht widersprechen inchainerlai weis alles treulich und ungeverlich; des zw ainem statten waren/ und vesten urkund so geben wir dem offt bemelten herren von Wilhering, seinem gotzhaws und allen ieren nach-/ kommen den gegenburttigen brieff besigelt und wolbestat mit des edlen Andreen Krewssen, dy zeit pfleger/ zw Attenshaim auch des erberen weisen Hannsen Stokchmaister, burger daselbs paider anhangunden in sigillen,/ dy wir durch unser pettzedl vleissiklich darumb gepeten haben, doch in und ieren eriben anschaden; darunder ich/ mich obgemelter Jorig Startzer und ich Margreth, sein hausfraw fur uns, unsere chinder auch anstat der obge-/ schriben unser frewnd, wie dy mit namen oben an dem brieff geschriben sten der volmachtigen verschriben gbalt/ und dafur wir uns angenommen haben und fur unser und ir eriben vestiklich verpindten mit unseren trewen ay-/ des weis, inhalt des brieffs war und stat ze halten. Spruchlewt und taydinger der sachen sein gewesen: her Wolf-/ fgang Aichinger, pfarrer zw Schonhering, Vlreich Scheffmair auffm Edransperg, Hanns Stokchmaister, burger zw/ Attenshaim, Walther Alkover zw Alkoven. Der brieff ist geben (an) suntag oculi in der vasten nach christi ge-/ purdt viertzehenhundert und tzwayundachtzigisten jaren.