Ich Elspett, Stheffan des Wissmair tachter und Hanssen des Furoder selligen witib/ vergich fur mich und al mein erbnn und thuen kundt offenlich mit dem brieff allen, den er fur kumbt, das ich mit wolbedachten muet und guetten willen zw der zeydt, da ich das mit recht wolgetan hab mugen, recht/ und re[d]lich ledichleich verkauft und zw kauffen geben hab unnser ganczen zehat zw Nuspach in Gramasteter pharr ge-/ legen in Wessenberger landgericht Sigmund Prattweger zw Prattweg und seinen erben, der zelehen rueret von/ dem edlen und vesten Waltisar von Newling den eldter und dem erben unnser lieb herrn umb ain geldt,/ des uns wolbeguet und des wir zw rechten tagen an all schaden gancz aus gericht und bezalt sein wa-/ rden; wir haben in auch den egenanten zehendt zw Nuspach mit seiner zwe geherumb auf geben, bestett/ und ingeandburt mit lehenherren handt und aller der stett, der sich dar uber pedurffen, dar zw mitt/ allen den ern, nuczen und rechten, so dar zw gehort oder davon bekemen mag, des nichts ausgeno-/ men und mugen auch nufurbas mit dem selben zehent allen iren frumen schafen, verseczen, ver-/ kauffen, schaffen machen und geben wem sy wellent und da mit tunn und handeln, wie sew verlust/ an unsser und aller unsser erben und auch menichleychs von unsser wegen irrung und hindernus ungeverlich./ Wir sein auch des obgenanten zehents zw Nuspach mit seiner zwe geherung ir recht gber und fur stant/ fur al ansprach, wo oder wenn und wie oft in des mit recht nat und durft beschiecht, alls dan/ solhs kaufs zehents lehens und landes ob der Ens recht ist. Gieng in aber mit recht dar an icht/ ab, wie sich das fuegt oder von wem das war mit dem rechten, das sy zw schaden kamen, den selben schaden zw sambt dem abganchgk und kauf sullen und wellen wir in genczlich erstatten/ und wider keren, und sullen sy das albeg haben zw uns, unsser erben und trewen dar zw auf allem/ dem guet, so wir uberall haben, gewinnen und lassen, und mugen sy haupt guett, abganchg und/ schaden davon pechemen, so sy nagst und pest mugen, das ist alles unsser guetter willen und wardt an/ wider sprechen, wir sein lembtig oder tod, mit urchundt des briefs besigelt durich unsser fleyssigen pett/ willen mit des benanten edel und vesten herrn Walthysar von Newdling, unnser lehen herrnn/ der eltter und lehentrager in sigil und doch im und seinen erben an schaden und an seiner lehenschaft/ vodrung und rechten unengolten; dar under ich mich vorgenante Elspet und fur al mein erben fer-/ pindt mit unsser trewen, alles das war und stat zehallten, so oben andem brieff geschiben stett. Geben/ am mantag in den phincztfeyrtag nach cristi gepuert taussent fur hundert und in dem/ fur und achstgisten jar.