Ich Walthasar Newndlingar zw Rottenek wekenn fur mich und fur all mein erbm und tun kund/ offenlich mit dem brieff allen, den er zw horen oder lesen furkumbt, das ich mit wolbedachtem/ muet und mit guetem willen zw der czeit, da ich das wol getun mocht, recht und redlich verchauft/ und zw chauffen geben hab den zechleitten an stat des wirding goczhaws sand Larenczen chirichen/ zw Gramhartstetten mit namen Sigmund Durstpergar und Hanns Chaiserschuestar dy zehant auff/ der widem pey dem [Eitten]perig, auff dem guet zw Parigfrid, auff dem guet zw Winthag und auff/ der hofstatt genant auff dem Schalnbergk, dy von mir und meinen erbm zw lehan sind gebesen und/ sind gelegan in Gramhartstettar pfarr und in Wachsenberger landtgericht, umb ain gelt, des mich/ wolbenuegt hat, des [ich zw] rechter zeit an allen schaden von in endricht und weczalt pin warden./ Ich gib in auch an stat des goczhaws dy obgenanten zehant in und allen iren nachkomen und/ des goczhaws fur [mich] und all mein erbm fur ledigs freis aigen aus mein und meiner erbm/ nucz und gber in der benanten zechleit an stat des goczhaws gbalt, nucz und geber, also das sew/ und all ir nachkomen zechleit, wer si sein an stat des goczhaws mit den vorbenanten zehant/ nun hinfur wol allen iren frumb schaffen, mit verchauffen, verseczen machen und gebm, wemb/ sew wellen an mein und meiner erbm auch manigklichs von meinen wegan irrung und/ hindernuss treulich und ungevarlich; ich obgenanter Walthasar Newndlingar secz mich auch/ des chaufs gegen den benanten zechleitten an stat des goczhaws und allen iren nachkomen ir recht/ gber und [furstand] zw sein aller stat mit dem rechten, wo in der not und durfft beschiecht, als/ solichs chauffs […] in dem land ob der Enns recht ist. Ging in aber an dem chauff und/ geberschafft mit recht icht ab, des sew und das goczhaws [schaden namben], den selbm schaden/ zw sambt dem […] sey […] un schuldig ab zu legen und [wider cheren] und sullen sy das/ habm zw [mir und] allen meinen eriben darczue auff allem meinem guet, wo wir das also/ habm, geb[ingen, und] hindter uns lassen, nichcz darinn besundert noch hindan geseczt hinczt/ das sy haub[tguet] und schaden benugig sein, das ist alles mein guetleicher will und wardt,/ wir sein lembtig oder tod. Des zw ainem waren vesten und statten urkund der obverschriben/ sachan gib ich obgenanter Walthasar Newndlingar dem egemelten goczhaws sand Larenczen/ und den zechleitten daselbs und allen iren nachkomen den brief wesigelt und wolbestatt/ mit meinen aigen anhangunden insigel, darczue hab ich mit vleiss gepetten denn/ edlen vessten Wolfgang Newndlingar, meinen liebm vetter, das er zu czeugnuss der/ sachann sein insigl zw mir an den brieff gehangen hat, doch imb und sein erbm an schaden./ Darundter ich mich obgemelter Walthasar Newndlinger verpint, alles das war und statt/ zw halten, so oben an dem brieff verschriben stet, der gebm [ist an] suntag nach sand aitten/ tag, alls man zallt von christ gepurdt vierczehan hundert iar und darnach in dem/ newn und achczigkisten jaren.