Ich Steffann Schindtler zu Obernnewnkirchen, ich Elspet, sein hausfraw bekennen fur uns und unnser eriben und thuen/ kund offenleich mit dem brieff allen, den er furkumbt, die in sehent, horent oder lesent, das wir mit wolbedachtem/ muet und gutem willen zu der zeit, do wir es rechtleich wolgethuen machten, recht und redleich verkaufft und/ ze kauffen geben haben dem erberen Hannsen Kuersner, burger zu Lanfelt, Elspeten, seiner hausfrawen und ieren/ paiden eriben unnsern gantzen tzechent, grossn und klain, so wir haben auff dem hoff zu Kellnperg mit seiner zue-/ [ge]horung, do yetzunt der Steffl auffsitzt, gelegen in Gramanstetar phar und Wachsnberger landtgricht, der/ selb tzechent freys aigen ist; also antburten wir den egemelten tzechent aus unser und unser eriben gbalt, nutz/ und gber in ir und ierer paider eriben gbalt, nutz und gwer mit allen eren, rechten und nutzen, als wir den/ selbs ingehabt und herbracht haben umb ain sumb gelts, daran uns wolbenuegt hat und des wir von inn/ gantz und gar ausgericht und betzalt sein zu rechten tagen an allen schaden; darauff vertzeich wir uns, ich Steffan/ Schindtler und ich Elspet sein hausfraw fur uns und all unnser eriben des egemelten tzehents wissentleich in/ krafft des brieffs, also das wir, all unser eriben noch ander yemant von unsern wegen darnach, noch da gegen/ chainerlay gerechtikait, zuespruch, ansprach, noch vordrung nymermer gehaben sullen noch gewingen wel-/ len, weder mit recht noch anrecht, in chainerlay weis, sunder Hanns Kuersner, sein hausfraw Elspet und ir/ paider eriben mugen nuhinfur mit dem obgemelten tzechent wol allen iern nutz und frumben damit handeln/ und betrachten, in haben, nutzen und niessen, verseczen, verkauffen, schaffen machen und geben, wem sy wellent an/ uns, unser eriben und als manigkleichs von unsern wegen irrung und widersprechen; wir sein auch dar-/ umb ir recht gbern und fuerstant furall rechtlich ansprach, wo, wann und alsofft in des notdurfft beschi-/ echt mit dem rechten, also kauffs gberschafft und freis aigen lanndes ob der Enns recht ist angever. Gieng in aber an dem kauff und gwerschafft mit recht icht ab, also das in krieg infel oder ansprach darumb aufferstuent, von wem das war oder wie es sich fueget, das sullen wir in alles ausrichten und richtig machen an/ all ir schaden und mue. Tatten wir des nicht, was sy des dann schaden namen, sullen und wellen wir in allen/ gantzleich abthuen und widerkeren an alle widerredt; und sullen sew das alles haben zu uns, unsern eriben und/ trewen und darzue auff aller unser hab und guet, wo wir das unverschaidenlich uberall indert haben und/ aller ierer schaden gantz davon bekomen wie sy nagst mugen und in am pesten fuegleich ist, das ist unser/ guetleich wil und wort alles trewleich und ungeverlich; mit urkund des brieffs besigelt und wolbestat/ durch unserer vleissigen pete willen mit des edlnn vestnn Walthasar Newndlinger zu Rotenegk anhan-/ gunden in sigel, im und sein eriben anschaden. Darundter ich mich Steffan Schindtler und ich Elspet, sein haus-/ fraw fur uns und unser eriben verpindten mit unseren trewen aides weis, inhalt des brieffs war und/ stat zehalten, der geben ist an mitichen nach Sannd Veits tag nach christi gepuerd viertzehen hundert/ und newnundachtzigisten jaren.