Wir Friderich von gottes gnaden Römischer Kaiser, zuallenntzeitten merer des reichs, zu Hungern, Dalmatien, Croatien etc. Kunig, Hertzog/ zu Osterreich, zu Steyr, zu Kernnden und zu Crain etc. bekennen fur uns und unser erben, daz wir angesehen haben den loblichen gotsdinst, so der ersam geistlichen,/ unser lieb andechtigen, der abbt und convent zu Wilhering volbringen auch den manngel, so dy an vasst tagen, der sy innhallt irer regel im jar ettwevil ge-/ brauchen und hallten an narung besonder an vischen nachdem sy mit aigner vischwaid als wir bericht nicht furgesehen seien leiden und haben in dadurch/ und von sonndern gnaden, damit sy denselben irn gotsdinst deststatlicher auswartten, des wir auch hoffen tailhafftig zewerden, die gnad getan und ver-/ gunntt und erlaubt haben, tun, vergunnen und erlauben auch als regirennder herr und lanndesfurst in Osterreich unnder und ob der Enns in krafft des/ briefs, daz sy ain freyen vischer auf halben tail der Tu/onaw vor des bemelten gotshaus gru/onntten, soverr die ungeverlich ob und underhalb Wilhering an/ derselben Tunaw sew haben der daselbs ain erchslahen visch darauf oder mit gereyder fechen rewschen, grossem und khlaim garn und eysprechen vahen und/ der zu irn und [desselben] irs gotshaus notturfften gebrauchen mugen von meniklich ungehindert ungeverlich. Davon gebieten wir den edeln unsern liebn/ getrewn, allen unsern haubtleuten, grafen, frein herren, rittern und knechten, phlegern, burggrafen, lanndtrichtern, burgermaistern, richtern, reten,/ burgern, gemainden und allen anndern unsern ambtleuten, undertanen und getrewn, besonnder unserm lieben getrewn Micheln von Trawn, unserm phleger/ zu Wechssemberg und unsern burgern, leuten und vischern gemainklich zu Otenshaim, gegenwurttigen und kunfftigen ernstlich und wellen, daz sy die obbe-/ nannten abbt und convent und ir nachkomen bey disen unsern gnaden vergunnen und erlauben, wie vor steet genutzlich und berublich beleiben lassen, und in/ daran khain irrung noch hindernuss tun noch des yemannds anderm zetun gestatten in chain weis ungeverlich; das mainen wir ernstlich mit urkundt/ des briefs. Geben zu Lynntz an Montag vor sannd Annthonien tag nach cristi geburde viertzehenhundert und im drewundnewntzigisten unsers/ kaisertumbs im ain[…]tzigisten unserr reiche romischen im drewundfunfftzigisten und des Hungrischen im vierunddreissigisten jaren.