In dem nomen der heyligen und unertailltn [drivaltikait] amen. Ich Caspar Schefmair aufm/ Edreinsperg bekenn fu/or mich, all mein eriben, freu/ondt und nachkome[n] lebenntig gegenwurtig und kunftig und thu/on kund/ allermeniclich mit dem offen brief allen, den er zu/osehen, horn oder lesen fu/orkumbt, das ich angesehen hab mein verirrt und ellennds/ hausgeschaft und zergenngklich leben, darinne ich kains leiberiben und kinds zugewynnen verhoffe, und das all menschen sterben nichts/ gewissers dann der tod und nichts ungewissers ist, dann die zeyt, weil und stundt des tods, sonnder auf das ewig gedacht; dardurch ich/ aus sonnderlichem genaigtem willen, so ich zu unnserr liebm frawen gotzhaws ze Wilhering hab mit wolverdachter freyer guter wissen/ zu der zeyt, do ich das mit gesunttem leib an all meiner eriben, freundt und allermeniclich widersprechen und inred wolgethun mocht, auch/ gutrecht und macht zethun hette wissenntlich in craft des briefs zu freyem ledigem und aigenhafften gut geordnet, gemacht und geben hab/ zu unnserr lieben frawen gotshawss zu Wilhering den erwirdigen geistlichen herren und vattern herren Thoman abbt und dem gannczen/ conventt daselbs und allen iren nachkomen all mein pawmansrechten, so ich von genaden wegen hab an und auf dem Schefhof aufm Edreins-/ perg, aller seiner rechtlichen zu/ogehorungen des mergedachten gotshawss Wilhering freys aigen. Darczue all mein varunds gut uber clain/ und gross darinn und durchslechts nichts ausgenomen noch besonndert, alles in solcher gestallt, mass und form, ob ich obgenannter Caspar/ Schefmair vor meiner hausfrawn etwann Michel Harder zu Hard seling tochter, die nach irs leibsmangel und prechen von mir tailt und/ gesonndert ist, mit tod abgee. Danne sullen mein genadig herren von Wilhering all meins pawmansrechten aufm Schefhof, seiner/ zu/ogehorungen darczue all meins varunden guts bey clain und gross, gar nichts ausgenomen noch besonndert als ir aigennhaffts gut/ unnderwinden, innemen, innhaben, nuczen, niessen, in freysess weis verlassen, stifften, storn und entstifften oder zuvererben und allen/ iren nucz und frumen damit zehanndeln thun und lassen, wie sew verlust nach allem irem willen und gefallen an all meiner eriben, freundt,/ nachkomen und allermeniclich von iren wegen irrung, einred und widersprechen treulich ongeverde. Geschech dann aus schickung des al-/ mechtigen gots, das mein vorangeczogen hausfraw mit tod vor mir sturb, so hab ich mir hie in disem gemecht vorbehallten, ob ich mich/ nachmals verrer beheirattet in hoffnung, kinder zuerlanngen, so sol mich ditz gemecht meinen genadigen herren von Wilhering tan/ nicht irren noch verhindern sonnder nach meinem tod sullen in mein nagsteriben dafur in jarsfrist geben und zallen zwayunddreissigk/ phund phennig lanndeswerung. Und wann mein genadig herren von Wilhering solh zallung von mein eriben nach meim tod emphaben,/ sullen sie disen gemachtsbrief meinen eriben zu iren hanndten heraus antwortten treulich ongeverde. Wenn ich mich nach meiner hausfraw/ egemelt beheiratten wurd, so sol und will ich ainer hauswirttin uber die obestimbt sum gellts so mein genadigen herren vermacht und fu/or-/ czaigt ist aufm pawmansrechten und varunden gut aufm Schefhof ain geleichs gemacht thun, damit dy kinder, so ich mit ir gewunne nicht/ zuvast beswert wurden. Begeb sich dann, das ich mein hausfraw, des Harder tochter uberlebtte weytter ain anndre hausfrawen nemb, die/ ich auch uberlebtte und kain kind mit ir hiet oder weytter kain hausfrawen nemb, also mit tod verschied, so sol mein genadigen herrn von/ Wilhering alles pawmansrechten und varund gut, wie obenverschriben gannts ledig als ir aigen gut nachvolgen an all meniclich wider-/ sprechen; engegen sullen mein genadig herren von Wilhering nach meinem tod meiner sel desterpaser mit ainem gotzdienst zehalten/ gedenncken nach irer gewissen und sonnderm vertrawen, das ich zu iren genaden hab treulich ongeverde. Ich obbenannter Caspar Schefmair,/ all mein eriben, freundt und nachkomen sein auch unnserr lieben frawen goczhawss zu Wilhering und dem abbt und ganntzen conventt/ daselbs meiner genadigen herren umb alles obverschriben gemacht und gab recht gewer und fu/orstannt fur all rechtlich ansprach,/ wo, wann und wie oft […] zurecht not und durfft beschiecht, alsdann gemachts und goczgab in aller obverschriben maynung und innhalt/ lanndes ob der Enns recht ist. Gieng in aber daran icht ab, oder das in in allen und yeslichen puncten und artickeln, sovor verschriben/ ainicherlay krieg, irrung oder ansprach darinne auferstuenden, von wem das wer oder wie es sich von unnsern wegen mit dem rechten fuegte,/ des sy schaden nehmen, wie der schaden ungeverlich genannt wurde, denselben abganng und schaden allen zusambt disem obverschriben gemecht/ und gab auch gewerschaft geloben sullen und wellen wir in an all ir mue abganng und schaden berait kerung thun erstatten und richttig machen./ Sy sullen und mugen auch das alles haben, suechen und bekomen ze mir, allen meinen eriben, freundten und nachkomen darczue unverschaidenlich/ auf und von aller unnserr hab, erb und gut anligund und varund, clain und gross, so wir uberall inner oder ausserlanndes haben, gewynnen oder lassen,/ darinne auf wasser und lannde nynndert noch nichts ausgenomen, des sew ain yeder lanndesfurst, sein lanndmarschalh, haubtman oder richter/ in des herschafft oder gepiet solh unnserr gut ligt eraischt oder begriffen wirt wol sovil und lanng gewelltigen, inantwortten und die innehaben,/ nuczen und niessen mugen unnczt sy vollig an allen abganng und schaden beleibennt wann dahyn haben die herren von Wilhering alle geistliche/ und weltliche rechten am erssten furkomen wo der brief furbracht, zaigt und verlesen wirt gannts erlanngt, behabt und wir oder meniclich der dawider/ tett gannts ungerecht und verloren treulich und ungeverlich; des zu warem und vesstem urkunde dits offen briefs hab ich obgenannter Caspar Schefmair/ in sonnderm vleis die edeln vessten Hanns Dienndorffer zu Gneyssenaw, diezeit phleger zu Otenshaim und Michael Haberstorffer zu Wallting/ an der zeyt spitalmaister daselbs gebeten, das sy ire insigel in baiden iren eriben und insigeln an schaden zuczeugknuss und stet dises obverschriben/ gemecht und gab an den brief gehanngen habm; darunder ich mich und fur all mein eriben, freundt und nachkomen mit meinen trewen aidesweis/ verpinde, alles stet zuhallten, nachzugeen, volfu/oren und ingedennck zusein, innhallt des briefs. Geben am heyling gotsleichnamsabent nach crist unsers/ lieben herren geburde vierczehenhundert und vierundnewnczigisten jarn.