Wir swester Engel zu den zeiten maistrinne. swester Elzbet die priorinne. swester Gerdraut die subpriorinne. und die samnunge gemaine der vrouwen Chloster datz der himelporten ze Wienne. veriehen und tun chunt allen den die disen prief lesent oder horent lesen. die nu lebent und hernach chunftich sint. Daz wir gehapt haben. Neun phunt wienner phenninge geltes purchrehtes. auf hern Ulriches haus des Zaendleins daz da leit in dem fischhof. an dem hohenmarchte ze Wienne daz uns umb daz selb purchreht vervallen ist und umb alle die zwispilt. die uns vor rehtem gerihte. mit vrag und mit urtail darauf ertailt sint, als lange. untz daz daz haus niht tiwer gewesen ist. denne daz vorgenant purchreht. und die zwispilt die wir auf dem selben haus behapt haben. und auh uns da fur in geantwurtet ist. mit des gerihtes poten. als der prief sait, den wir dar umb haben. von hern Chunraden dem Gartner zu den zeiten rihter ze Wienne. vor dem wir in der purgerschranne daz selb haus. mit vrag und mit urtail behapt haben. Daz vorgenant haus. haben wir mit guten willen. mit verdahtem mute. und mit gemainem rat unser Samnunge. verchauft und geben. der erbaern vrowen. vron Mergarten hern Lambers wittiwe dem got gnade. und irn erben. umb die vorgesprochen Neun phunt wienner phenninge geltes purchrehtes. die si und ir erben. oder swer daz haus nah in besitzet. uns. und unserm Chloster alle iar da von dienen suln. zu driu zeiten in dem iar. dreu phunt ze weihnahten. dreu phunt an sand Jorgen tage. und dreu phunt an sand Michels tage. mit allem dem reht. und man ander purchreht in der Stat ze Wienne dient. und haben auh wir mit guten willen. ledichlichen vreilichen. und umbetwungen-lichen daz selb haus auf geben. vron Mergarten der Lamberinne und irn erben. mit des gruntherren hant. hern Mertten zu den zeiten Chaplan und verweser. der Chappellen unser vrowen. in dem hause, daz weiln hern Otten hern Haimen gewesen ist. dem man alle iar von dem selben haus dient . dreu phunt wienner phenninge fur gruntreht und fur purchreht, zu driu zeiten in dem iar . also mit beschaidenner rede . daz vro Mergart die Lamberinne . und ir erben . suln furbaz ledichlichen und vreilichen . mit dem selben hause allen irn frumen schaffen . verchauffen versetzen . und geben swem si wellen an allen irresal . und sein auh wir des vorgenanten hauses . unverschaiden-lichen . vron Mergarten der Lamberinne . und ir erben rehter gewer und scherm fur alle ansprach als purchrehtes reht ist und der Stat reht ze Wienne . und geben in dar uber disen prief zu einem offen urchunde . und zu einem waren gezeuge . und zu einer ewigen vestnunge dieser sach versigilten mit unser Samnunge insigel . und mit des grundherren insigil des vorgenanten hern Merten . und mit hern Chunrades insigil des Gartner zu den zeiten Rihter ze wienne und mit hern Nichlas insigil von Ezlarn . und mit hern Nichlas insigil des Pollen die dieser sach gezeug sint mit irn insigiln . und sint auh des gezeug . her Stephan der Chrigler . zu den zeiten purgermaister ze Wienne . her Herbort auf der Seule . her Hainrich der Lange . her Herman der Snaetzel . her Herman der Rudolfinne Enenchel von sand Polten . her Fridrich der Gnaemhertel . her Wilhalm pei dem prunne . her Jacob sein pruder her Wilhalm in dem Strohof . und ander frume leute genuch den die sach wol chunt ist. Dieser prief ist geben ze Wienne nah Christes geburt Dreutzehen Hundert iar in dem Siben und Zwaintzgisten iar dar nah an sand Merteins tage.

Source Fulltext: Peter Peusquens