Ich Hadmar von Mezzenpach vergich an disem prief und tuon chunt allen den die in sehent oder hoerent lesen daz ich hern Ulreichen den Pruesinch, und seinen pruoder Fridreichen han versatzt umb fumfthalb pfunt pfennig wienner munz gegen dem Piber auf den Fasschanch, und swie getan schaden seu dez nement, den schol ich in ab tuon, ze Juden oder ze Christen, und swan seu der pfennig und dez schadens nicht lenger peiten wellent, so schullen si mich pfenten an rosschen oder an pferftenn oder auf meinem guot auf dem land, mit meinem guotleichen willen, daz die red stet peleib, und unzebrochen, dar uber gib ich vorgenanter Hadmar, dem vorgenantem hern Ulreichen, und seim pruoder Fridreichen, disen prief ze einem urchund versigelt mit meinem Insigel. Der prief ist geben ze Chrems, do von Christes gepurt waren ergangen dreutzehen hundert jar, dar nach in dem siben und zwainzichsten jare, dez vreitags vor sand Niclas tag.

Source Fulltext: Peter Peusquens