Wir Mainhart phaltzgraf ze Kernden, Graf ze Gortz und ze Tyrol etc. Embieten, den erbern weysen dem Purgermaister Richter dem Rat und gantzer Gemain ze Wyenn, unsern grues. Als ewer mitpurger, und chaufman, Nicla Rorcholb, von seinen und seiner gesellschaft wegen, mit ewerm petbriefe, yezund zu uns koemen ist, denselben Rorcholben haben wir erhoret durch ewern willen, wie doch daz ist, daz wir im von rechts wegen, nichts schuldig, noch gepunden waren, und geben im und seiner gesellschaft, ze widerlegung irer verlust, sibenhundert Guldein, die wir in opden wellen, auf die Statstewr ze Wyenn, da ir uns mit wartent seit, nach sag unserer briefe. Davon emphelhen wir ew mit ernste, wann daz ist, daz ir uns unsers gelts, so uns, von ew untzher verhalten und aufgehaben ist, waz des ist, gêntzleich auzgericht habt, daz ir danne nach derselben unsrer auzrichtung, den eegenanten Niclan Rorcholben, und sein gesellen der eegenan-ten sibenhundert guldein auzrichtet und betzalet, von den nêchsten Quatembern, die nach der richtung, so ir uns getan habt, chunftig wertent, wann wir ew, umb alsvil Summe gelts, danne ledig sagen wann ir die bezalt habt. Mit urchunt diez briefs versigelt mit unserm Insigel. Geben ze Lunz am nêchsten phinztag nach sand Katreyn tag, nach Christs geburd dreutzehenhundert jar dar nach in dem zway und achtzigistem jare.

Source Fulltext: Peter Peusquens