Ich Hanns und ich Hêrwaert geprueder auf der Saewl purger ze Wienn und all uenser erben, wir vergehen offenlich mit dem brief das wir von des gepots wegen so weyln der hochgeporn fuerst hertzog Rudolf selig von Oesterreich in der Stat ze Wienn umb Gruntrechts ablasung aufgesatzet und gepoten hat Recht und redleich abtzelosen geben haben, herrn Hannsen von Tierna ze den zeiten hubmaister in Osterreich, und seinen erben, drey wienner phenning gelts Gruntrechts die wir gehabt haben auf irem haws gelegen an ainem tail gegen sand Stephans freythof ueber das ekkhaws voders und hinders das weilnd Chuenrats des appoteker selig gewesen ist und leit mit dem andern tail under den Goldsmiden zenechst dem haws das weylnd des Straiher des Goldsmids gewesen ist, umb vier und zwaintzig wienner phenning den uns der vorgenant her Hanns von Tierna gantz und gar gewert hat Also, das er und sein erben und alle die, die das vorgenant ier haws nach In innhabent und besitzent der vorgenanten dreyer phenning gelts gruntrechts furbas ewich-leich darab ledig und frey sein sullen und der denan nicht mer ze dienen und sullen auch wir noch all unser erben noch ander yemand von unser wegen furbas auf das vorgenant ier haws von der egenanten dreyer phenning Gruntrechts wegen weder mit brief noch uerkund noch an brief noch uerkund nymmermer chain ansprach noch vodrung haben noch gewinnen in dhainen weg Wer aber das fuerbas icht brief oder urkund furpracht wuerden von wem das wêr, di auf das vorgenant haws umb die egenanten drey phenning gruntrecht sagten diselben prief und uerkunt sullen dann alsverr als si das vorgenant Gruntrecht rueraent allerding toed und zenichte sein und chain krafft haben weder vil noch wenikch Und doruber So geben wir In den brief zu einem waren uerkund der Sach versigilten mit uensern paiden anhangunden insigilen Der Geben ist ze Wienn nach Christi gepuerd dreutzehen hundert iar darnach in dem drew und achtzigistem iar des nechsten freytags nach sand Kathrein tag der heiligen junchfrown.

Source Fulltext: Peter Peusquens