Ich Ulreich der Zinkk zu den zeiten obrîster Spitalmaîster der Purger spital vor Kernertor ze Wienn, vergich und tuen kunt offennleich mit dem brief umb die zyegelwerichstet, die hernach benant sind, und swaz dartzue gehoeret, gelegen vor Kernertor, bey den zyegeloefen ze Wienn daz alles fraw Kuenigund selig die Spieglerynne, zu dem egenanten Spital umb einen ewigen Jartag geschafft hat, als Ir geschefftbrief lawttet den Si hinder Ir lazzen hat. Vonerst zwo hofstet, die von maister Mertten gechauft sind, und zwen zyegeloefen daran zenechst dem Meanschein und ein hofstat weingartens, und zwen zyegeloefen daran, daz von Niclasen seligen dem Poellein gechauft ist, genant die Grodlerynne, und aber ein hofstat weingartens und zwen zyegelofen daran, die von den Geistleichen frawen datz sand Chlarn ze Wienn gechawfft sind, daz alles nu zueinander gefangen ist, als es weilnt Michel seliger der Raentsch, der egenanten frawen Kuenigunden eleicher wirt ynnegehabt hat. Und darumb so hab ich mich an mein selbs, und an aller meiner Nachkoemen stat, Spitalmaister und verweser des egenanten Spitals, verluebt und verpunden, und verpind auch mich wizzentleich mit dem brief, gegen Jannsen dem Spîegler, der egenanten frawen Kuenigunden stewssun und gegen seinen Erben, daz ich und mein Nachkoemen, welich die ye die zeit sind, einen ewigen Jartag begen suellen, in dem vorgenanten Spital ewichleich alleiar jerleich, des nachsten Suntags vor sand Symans und sand Judas tag, der heiligen zwelfpoten, mit Vigilyen, mit Selmessen, mit gelewtt, mit Chertzen, und allen andern Gotzdiensten, als ander Jartag zubegen, in demselben Spital sit und gewonhait ist, Got und uenser frawen ze lob und ze ern, und der obgenanten frawen Kuenigunden und ires wîrts, des egenanten Michels, und aller irer vordern seligen, und Nachkoemen Selen, und allen Gelauwigen Selen ze hail und ze trost. Und suellen auch Si daz haben, datz dem egenanten Spital, und datz allen den Guetern Likkunden und Varunden, die es hat, in den Lannden ze Oesterreich oder wa es die hat, die zu demselben Spital gehoerent. Und darueber zu einem warn urchuend, gib ich obgenanter Ulreich der Zinkk fuer mich und fuer alle mein Nachkoemen Spitalmaister und Verweser des vorgenanten Spitals, dem genanten Jannsen dem Spîegler, und seinen Erben, den brief versigelten mit desselben Spitals anhanngundem Insigel Der brief ist geben ze Wienn Nach Kristes gepuerd drewtzehenhundert jar, darnach in dem fuenf und achtzigistem jar, des nachsten Mittichens nach sand Mathias tag, des heiligen zwelfpoten.

Source Fulltext: Peter Peusquens