Ich Poyzla von Nuozdorff und ich Matz sein hausfraw vergiehen an disem prief allen leuten . Datz wier gelten suln Pluom der Judin und iren erben acht march silbers grozzer pehemischer phenning . Suln seu der wern an sand Georigen tage der schirist chuomt . Tuont wier des nicht so get fuorbaz alle wochen zuo gesuoch auf di march ain grozzer phenning . und hawen in da fuor ze phant gesatzt mit unserz perch-herren hant hern Chuonrat des Nuozdorffer unsern weingarten in dem Mukental mit paw mit alle des drew viertail sind leit zenest der Hailmannin . dient alle jar achtethalb viertail weins ze perchrecht und drithalben phenning ze foit Recht und nicht mer . und waz in am phant abget daz suln seu hawen auf unsern trewn und auf alle den und wier hawen. Des gib ich in dar uber disen prief versigilt mit unserm Insigil und mit unsers perchherren Insigil hern Chuonrat des Nuozdorffer der diser sach gezeug ist mit seinem Insigil. Diser prief ist geben nach Christ gepuort dreuzehen hundert jar in dem acht und zwainzigister jar acht Tage nach sand Georigen tage.

Source Fulltext: Peter Peusquens