Ich Chunrat der Gartner zu den zeiten Richter ze wienne . vergich und tun chunt allen den die disen brief lesent oder horent lesen Daz fur mich chome der erber herre her Andre der Chrannest zu den zeiten Pharrher datz Ruprechtzhofen und chlagt vor mein in rechtem gerichte. in der purger schranne ze wienne . hintz Jacobs haus dez Choler daz da leit an der Langenmaur daz weiln Albers dez Choler der Murinne pruder der flaeschhacherinne gewesen ist . umb achtzich wienner pheninge purchrehtes alz lange untz daz im mit vrage und mit urtail zwispilt dar auf behabt hat ze viertzehen tagen . und hat auch dar umb so lange chlagt . baide umb daz purchrecht und umb die zwispilt alz lange untz daz daz haus nicht teur gewesen ist . und pat dar umb vragen wie er da mit varn solt . dez ward im ertailt vor rechtem gerichte ich solt im zwen man geben die daz haus beschauten unde schatzten . mit sampt den umbsaetzen ob daz haus icht teur waer denne daz purchrecht und die zwispilt die er dar auf behabt hiet daz han ich getan . und han im geben Otten den Grozzenchneht und Herman den vorsprechen an der Schefstrazze . die habent daz selbe haus beschaut und geschatzt mit samt den umbesaetzen . und habent auch daz vor mein gesagt alz si ze recht solden do daz geschach . do ward im ertailt mit vrag und mit urtail vor rechtem gerichte er solt mir mein recht geben . und solt im denne daz selbe haus in antwurten fur das vorgenant purchrecht und zwispilt daz han ich getan . und gib im dar uber disen brief zu einem offen urchunde versigilt mit meinem insigil. Diser brief ist geben ze wienne nach Christes gepurt dreutzehen hundert iar in dem acht und zwaintzgisten iar dar nach dez naehsten Mittichens nach sant Jorgen Tage.

Source Fulltext: Peter Peusquens