Wier Pawl der Holtzchewffel zu den zeiten purgermaister, und der Rat gemain der Stat ze Wienn. Vergehen fuer uns und fuer all unser Nachkomen und tun kunt offenleich mit dem brief, daz wir unverschaidenleich gelten sullen dem Erbern herren hern Fridreichen von Liechtenstain Marschalichen in Kernden, Chamrer in Steyr, und seinen Erben, sechshundert phunt wiener phening, die Si uns berait gelihen habent der wir Si oder wer uns an irer Stat mit dem brief mant unvertzogenleich richten und weren sullen an unser frawen Tag zu der Liechtmezz der schierist kumt. Tuen wir des nicht wenn si uns denn mant und vodernt so sullen wir in des nachsten Tages darnach vier Erbern chnecht yeden man selbandern mit zwain pherten gen Wienn hintz Micheln dem Fuechslein dem Gastgeben senden und sullen die da inneligen, und laysten, als inneligens und laystens recht ist und da nicht auschomen si sein denn der vorgenanten Sechshundert phunt wienner phenning gantz und gar verrichtet und gewert. Wêr aber daz in laistung verzogen wuerd oder daz man in virtzehen Tag innelêg und laystet und daz si dennoch der obgenanten Sechs-hundert phunt nicht verrichtet und gewert wêren Swas schadens si denn derselben phenning furwaz nement datz kristen oder datz juden von welicherlay dingen es sey daz schaden gehaizzen mag denn ainer ley seinen trewn ungesworen gesprechen mag der den brief zaygt denselben schaden mitsambt dem hawpguet sullen wir in gêntzleich ablegen und widercheren daz lueben wir in ze laisten mit unsern trewn an gevêr. Si sullen auch haupguet und schaden haben datz uns und unsern nachkomen unverschaidenleich und datz allem unserm guet daz wir haben in dem lannde ze Oster-reich oder wa wir es haben daz zu der vorgenanten Stat Wienn gehoert Wannd daz vorgenant gelt zu unsern scheinwerengen notduerften gevallen ist den hochgeporn herren .. den jungen Grafen von Goertz an dem gelt daz man in jêrleich von der egenanten Stat ze Wienn schatzstewr Raicht und geit. Und darueber zu einem warn urchuend geben wir in den brif ver-sigelten mit der vorgenanten Stat ze Wienn Chlainem anhanngundem Insigel. Der brif ist geben ze Wienne Nach Kristes gepurd drewtzehenhundert jar darnach in dem sechs und achtzigisten jar an sand Cholmanns Tag.

Source Fulltext: Peter Peusquens