Ich Chunrat der Nuzdorfer . vergieh und tuon chunt . allen den die disen brief lesent oder horent lesen . die nu lebent und hernach chuenftich sint Daz deu Erber vrawe . vrowe Margret deu Moganinne fuer mich chome . do ich sazze an rechtem perchtaidinge und chlait hintz einem weingarten der da leit ze Grintzingen und haizzet der Scherge dez drew viertail sint . und der sei mit recht an erstorben waer von irm Enen und von ir anen und auch ir ledich waer worden von allen Oertern mit dem Tode . und het auch daz Emaln vor mir so lange gechlait . daz ir mit vrag und mit urtail vor mir wart ertailt . da ich saz an dem gerichte . an rechtem perchtaidinge ich solt sei dez egenanten weingarten mit wein mit alle gewaltich machen . daz si in fuerbaz ledichleichen und vreileich solt haben und allen irn frumen da mit ze schaffen verchauffen versetzen und geben swem si welle an allen irresal. Detz han ich getan . und wand diseu sache vor mir da ich saz an rechtem perchtaidinge mit vrage und urtail recht und redleichen ertailt ist Gib ich vron Margreten der Moganinne und irn erben disen brief zu einem offen urchunde und zu einem warn gezeuge diser sache versigilten mit meinem Insigil . und mit hern Hagen Insigil von Spilberch zu den zeiten Juden Richter ze Wienne und mit hern Weichartes Insigil bei den Minnern Pruedern und mit hern Nyclas Insigil von Eslarn und mit hern Joergen Insigil an dem Chie(n)marchte und mit hern Hermans Insigil der Ruodolffinne Eninchel von sant Poelten . und mit hern Dietreichs Insigil dez Urbaetschen . und mit hern Wilhalms Insigil in dem Strohof und mit hern Ortolfs Insigil dez Chraechsner die alle diser sache gezeuge sint mit irn Insigiln. Diser brief ist geben ze Wienne nach Christes geburt dreutzehen hundert iar in dem Neun und zwaintzgisten iar dar nach an dem Neunten tage nach sant Bartolomes Tage.

Source Fulltext: Peter Peusquens