Ich Dietreich und Hans die Urbaetschen wir vergehen fuer uns und fuer alle unser Erben und tuen kuent offenleich mit dem brief, umb die drew phunt wienner phenning geltes purkchrechts die von dem hochwirdigen fuersten und vater in got, dem Byschof ze Passaw geledigt und geloest sind ab unserm haus gelegen in dem Winkchel an dem Chienmarkcht ze Wienn das weilent der Hannsin von Ybs gewesen ist nach des abloesbriefs Lauttung der darumb gewen ist, der verlegt, und ver-loren ist, das er itzund zu disem mal nicht funden werden noch zue weg chomen mag. Nw haben wir das vorgenant haws verchaufft Hannsen dem Stozzer und seinen Erben als der Chawfbrief sagt, den wir Im darumb gegeben haben den die Erbern weysen der Purgermaister und der Rat der Stat ze Wienn mit der Stat GruntInsigel besigelt haben. Und darumb so haben wir uns gegen In verlubt, und verpunden Swas Si des besiglens von der egenanten drew phunt wegen geltes schaden nement, das wir In den gentzleichen ablegen sullen an allen irn schaden. Und haben In dafur ze phannd gesatzt unser haws gelegen an dem Graben ze Wien das weilent unsers lieben vater gewesen ist, herren Hannsen seligen des Urbaetschen Mit urchunde ditz brifs besigelten mit unserm anhangundem Insigel und mit der Stat GruntInsigel ze Wienn Der brif ist gewen ze Wienn nach Kristes gepurd drewtzehen hundert jar dar nach in dem Newntzigistem jar des nechsten Mantags nach sand Johanns Tag ze Sunnwennden.

Source Fulltext: Peter Peusquens