Ich Jacob der echrer Purger zu Wienn und zu den zeiten chirchmaister der Tuem chierchen und des Rates zu Wienn vergich und tuen chunt offenleich mit dem brieff fuer mich und fuer all mein nachchomen chierchmaister umb die vier phunt geltes purchrecht die gelegen sint zway phunt auf dem sied haws under den slozzern zu nachst der paetstuben an dem alten Roezmarech zu Wienn und die der erbern man Hans auf der sewl purger ze Wienn geschaft hat zu aym ewigen jartag, den man begen sael iaerlich an sant Agnes tag nach der chirchen gewonhait, so ligent zway phunt auf der paetstuben vor widmer toer die er geschaft hat zu aim ewigen liecht, daz do prinnen schol vor unser frawen altar tag und nacht ob seiner pegrebnuzz, dor uber so verpint ich mich vorgenanter Jacob und mein nach chomen chierchmaister hintz dem erbern vesten Ritter Niclas dem Wurffell und hintz Paull dem Wurffel seim prueder zu den zeiten staetrichter zu Wienn und geschefft herrn des vorge-nanten Hansen auf der sewl, dem got genad als das stet zu halten und zu volpringen waz vor geschriben stet und als der prieff sagt den ich von den vorgenanten geschefft hern hab. Und wirt auch furbas dez geltes icht ab gechaufft daz schol dann nach meim und meinen nach chomen und nach des eltern Wurffels raet wider angelegt werden, daz das selgeret ich gemynnert werd. Mit urchunt ditz brieffs versigelten mit meinem anhangunden Insigel der geben ist zu wienn nach christi gepuerd drewtzehen hundert jar, dar nach in dem ain und newntzigistem jare an sand Michels tag.

Source Fulltext: Peter Peusquens