Ich Graf Thoman von sand Jorgen vergich und tun chunt allen den die den brif lesent oder horent lesen die nu lebent und hernach chuenftig sind das ich mit guetem willen und mit wolbedachtem muet zue der zeit da ich es wol getuen mocht . und mit hannden der erbern weysen Michels des Gewchramer zu den zeiten Purgermaister umd Müentzmaister und des Rats gemayn der Stat ze Wienne . Recht und Redleichen verchawfft und gegeben habe mein pran(t)stat gelegen ze Wienne oberthalb des hawses in der Ratstrazz des weilent hern Lewppolts von Syerndorf gewesen ist und stozzet dieselben prantstat an hern Hannsen haws des Lospergaer, und an Ernreichs haws des pekchen mit allen den nutzen und rechten als si unversprochenleich von alter in purkchrechts gewer herchomen ist Uemb acht phunt wienner phening der ich gantz und gar verrichtet und gewert pin meinem Lieben Ohem G(r)af Hannsen vom Forchtenstayn und seinen Erben furbaz ledichleichen und freileichen zuhaben und allen irn frumen damit zuschaffen verchawffen ver-setzen und geben wem Sy wellen an allen irrsale Und zuo einer pezzern sicherhait so setze Ich mich obgenanter Graf Thoman von sand Jorgen mitsambt meinen Erben unverschaidenleich uber die vorgenanten prantstat dem vorgenanten Graf Hannsen vom Forchtenstayn und seinen Erben zue rechten gewern und scherm fur alle ansprach als purkchrechts recht ist und der Statrecht ze Wienn. Waer aber daz In daran furbaz icht chrige oder ansprach auferstand von swem daz wer mit recht . Swaz si des schaden nement daz sullen wir In alles auzrichten und widerchern an allen irn schaden . Und sullen auch si das haben auf uns unverschaidenleichen und auf allem unserm guet das wir haben in dem Lannde zuo Oesterreich oder wa wir es haben wir sein lebentig oder tod. Und daz der chawf furbaz also staet und untzerbrochen beleib . daruber so gib Ich In den brif zuo einem waren urchund und zuo einer ewigen vestnung der sach versigillten mit meinem anhan-gundem Insigil und mit der Stat Gruntinsigil ze Wienn und mit meins liben Bruders Insigil Graf Petreins von sand Jorgen den ich des gepeten habe das er der sach getzewg ist mit seinem anhangundem Insigil. Der brif ist geben ze Wienn nach kristi gepurd drewtzehenhundert jar darnach in dem zway und newntzigistem jar des nagsten Mantags nach des heiligen Chraewtz tag als es funden ward.

Source Fulltext: Peter Peusquens