Ich Hainreich der Schetzel, und ich Janns der Trawtman. Wier vergehen offenleich mit dem brief daz wier uens nach uenser frewnt Rat, gegeneinander verluebt und verpunden haben, und ver-pinden uens uenser igleicher gegen dem andern mit dem brief, umb uensern erbtayl guetes, der uens anerstarben und angeerbt ist von frawn Dietmueten der Hinlawfinn der Got gnad, der nachst Erben und frewndt wier sein Also swas uens desselben guetes mit dem Rechten ertaylt und ge-sprochen wiert, das wir daz denn miteinander gleich taylen wellen daz desselben guetes uenser ainem rechtt alsvil gevall alz dem andern angever. Und wannd wier selber aigen insigil nicht haben darumb so geben wyer aneinander uenser igleicher dem andern den brief zu ainem warn urchuend der sach versigilten mit der zwayr erbern mann insigilen hern Joergen von Nicols-puerkch dietzeit des Rates der Stat ze Wienn, und Mertten des Reydekker puerger daselbens, die wier des vleissichleich gepeten haben daz Si der sach zewgen sind mit iern insigilen In an schaden Und verpinden auch uens mit uensern trewn an gever uender iern insigilen allez daz stet zehaben und zelaisten daz vor an dem brief geschriben stet Der geben ist ze Wienn nach Kristi gepuerde drewtzehenhundet jar darnach in dem fumf und Newntzigistem jar des freytags in der Ersten gantzen vastwochen in der vasten.

Source Fulltext: Peter Peusquens