Wir Stephan von gotes gnaden Probest. Nychlos der Techent und die gemayn des Conventes. des erbern Goteshouses unser vrowen ze Newenburch veriehen und Tun chunt allen den die disen prief lesent oder horent lesen. die nu lebent und her nach chunftich sint. daz wir mit guten willen. und mit veraintem Rat. mit verdachten mute. zu der zeit do wir ez wol getun mochten. recht und redelichen. verchouft haben. unsern weingarten. der da leit ze Chalnperge zenehest der peunt. das funf viertail sint. und haizzet der Cinche und des wir selber stifter und storer sein mit allem dem nutze und rechte. als er in unser Probistey gehort hat und wir in auch unversprochenlichen in perchrechtes gewer her pracht haben. umb drithalb hundert march silbers. wienner gewichtes ie zwen und sibentzzich grosse pehemischer phenninge fur ain jegliche march, der wir gar und gentzlichen verricht und gewert sein. dem erbaern manne hern Hermanne dem Syrfeyer. purger ze wienne. und vron Alhayden seiner housvrowen und ir paider erben ledichlichen und vreilichen zehalten. und furbaz allen iren frumen da mit zeschaffen. verchouffen. versetzen und geben swem seu wellen als in daz wol chom und fuege. an allen irresal. also mit ouzgenomner rede. daz seu uns und unserm Convent oder swer den vorgenanten weingarten nach in besitzet ledechlichen alle jar da von diennen schullen. in dem lesen. fur perchrecht und fur zehenten siben vierdunge silbers. zwen und sibentzzich grosse fur die march. und nicht mer. und schullen furbaz gegen in und iren erben, dechainen chrieg noch dechain ansprache auf den vorgenanten weingarten nimmer mer gehaben. und durch pezzer sicherhait so setzen wir uns. und unser Goteshous. dem egenanten hern Hermanne dem Sirfeyer und vron Alhaiden seiner housvrowen, und iren erben. uber den vorgenanten weingarten. ze rechtem gewern und scherm fur alle ansprache. als perchrechtes recht ist. und des Landes recht in Osterrich. und daz furbaz diser chouf und dise rede also stete sei. und untzerbrochen beleibe. dar uber so geben wir vorgenanter Probest Stephan. Nychlos Techent. und der Convent gemain unser vrowen Goteshous ze Newenburch, dem egenanten hern Hermanne, dem Sirfeyer. und vron Alhaiden seiner housvrowen und iren erben. disen prief ze ainem offen urchunde und ze ainer ewigen gezeugnusse und vestnunge diser sache versigilten. mit unsern anhangenden Insigeln. Diser prief ist geben ze wienne nach Christes geburt dreutzehenhundert jar dar nach in dem dreizzigistem jar an sand Nichlos Tage.

Source Fulltext: Peter Peusquens