Ich Volchmar auf der Seule. und ich Katrey sein hausvrowe. wir veriehen und tun chunt allen den die disen prief lesent oder horent lesen. die nu lebent und hernach chunftich sint. Daz wir mit unser erben guten willen und gunst. mit verdachtem mute. und mit gesampter hant zu der zeit do wir iz wol getun mochten. verchauft haben. unser rechten gulte. zwai phunt wienner phenninge geltes purchrechtes. auf hern Chunrades haus des Veltzer von Neunburch. daz da leit in der Stat ze wienne. pei der patstuben die da haizzet datz den Roeren. zwischen dem Goezlein. und maister Gerhartes haus des Brunner. Die selben zwai phunt purchrechtes haben wir verchauft und geben mit allem dem nutz und recht als si unser vodern und wir in purchrechtes gewer her pracht haben. an einen vierdunch umb zehen march silberes ie zwen und sibentzich grozzer pehmischer phenninge fur die march. des wir recht und redlich gewert sein. dem erbaern manne. hern Perchtolden dem Pollen. und seiner hausvrowen vron Margreten. und irn erben. furbaz ledichlichen und vreilichen zehalten. und allen irn frumen da mit zeschaffen verchauffen versetzen und geben swem si wellen an allen irresal. So beschaidenlich. daz her Chunrat der Veltzer. und sein erben. oder swer daz vorgenant haus nach in besitzet die egenanten zwai phunt purchrechtes da von dienen suln. hern Perchtolden dem Pollen. und seiner hausvrowen vron Margreten. und irn erben. alle iar zu drin zeiten in dem iar. zehen und funf schillinge ze weihnachten. zehen und funf schillinge an sand Jorgen tage und zehen und funf schillinge an sand Michels tage mit allem dem recht und man ander purchrecht in der Stat ze wienne dient. Iz ist auch daz aller naechst purchrecht. aller iarlich ze dienen. nach den zwelif phenninge. die man alle iar von dem selben hause dient meinem vater hern Herborten auf der Seule zu rechtem gruntrechte. und nach den drin phunden phenningen. die man auch da von dient. dem Gotshause unser Vrowen ze Neunburch Chloster halben. in die Oblay. und sein auch wir ich Volchmar auf der Seule. und ich Katrey sein hausvrowe unverschaidenlich mit sampt unsern erben. der vorgenanten zwaier phunt purchrechtes. hern Perchtoltz des Pollen. und seiner hausvrowen vron Margreten. und aller irr erben. rechter gewer und scherm fur alle ansprach. als purchrechtes recht. und der Stat recht ze wienne. Und daz diser chauf. furbaz also steet und unverwandelt beleibe. dar umb so haben wir in geben disen prief zu einem offen urchunde. und zu einem waren gezeuge. versigelt mit unserm insigil. und mit meins vater insigil. hern Herbortes auf der Seule. der des selben hauses rechter gruntherre ist. mit des guten willen und hant diser chauf gewandelt und geschehen ist. und auch diser sache gezeug ist mit seinem insigil. Diser prief ist geben ze wienne nach Christes geburt. dreutzehenhundert iar. in dem dreitzgisten iar dar nach. an sand Nichlas abent.

Source Fulltext: Peter Peusquen