Wir Albrecht von gotes gnaden Hertzog ze Oesterreich, ze Steyr, ze Kernden und ze Krayn, Grave ze Tyrol etc. Bekennen, Als die erber Kathrey weilent Thomans des Klaeynen von der Newenstat Tochter, alles daz Guet, das von Irem Vatter und Mutter, und von andern Iren freunden, und auch sust von wêm, das an Sy komen und gevallen ist, es sey Erbguet oder varund gut, unserm ge-trewen Hannsen dem Spiegler unserm KellrSchreiber, Irem elichen Mann geschaft hat. Das wir darzue unser willen und gunst gegeben haben, und geben auch wissentlich mit dem brief, Also, ob der egenante unser KellrSchreiber die vorgenante sein hausfraw uberlebt, daz dann alles das vorgenante Guet, das Sy hinder Ir laet, auf den selben iren Man lediglich gevallen und Erben sol, nach des Gescheftbriefs sage, den Sy Im darueber gegêben hat. Mit urkuend ditz briefs. Geben ze Wienn an freytag vor sant Oswalts tag. Nach Kristi gepurt dreutzehenhundert jar, und darnach in dem Sechs und Newentzigistem jare. dominus dux per m(agistrum) camere.

Source Fulltext: Peter Peusquens