Allen Lehenherren Gruntherren Perkchherren Purkcherren Pergmaistern und Amptlêuten den der brief gezaigt wirt hinder den die Gueter gelegen sind die Hanns von Eslarn Jacoben dem Chettner seinem Swager den beyden got genad versatzt hat nach des briefs sag der darueber gegeben ist des abgeschrifft wir ew mit der Stat ze Wienn klainem aufgedrukchtem Insigel senden Enbieten wir Purgermaister Richter und der Rat der vorgenanten Stat ze Wienn unsern willigen dinst, Wir tun ew zewissen das fur uns komen sind in offenn Rat Stephann der Frawndorffer an seiner vier Chinder stat Chaspars Wolffganngs Hestern und Marthan. Und Ott der Maydwiser an seiner Tochter stat Junkchfrawn Barbaren, und Niclas der Chamrer unser mitpurger an seinselbs stat und Jacob von Voytsperg an seiner kinder stat, und Hanns Hainreichs sun des Chamrer auch an seinselbs stat und habent da vor unser mit erber warer kuntschafft beweist das si zu den vorgenanten Guetern die des egenanten Jacobs des Chettner Satz gewesen sind auz des hannden derselb Satz gestorben ist recht erben sein als dieselb frewntschafft und beweisung, in uenserm Statpuech geschriben stet. Davon Bitten wir ew alle gemain leut und yeden besunderleich mit ganntzem ernst und fleisse das ir Sy der obgenanten gueter an nutz und an gewer setzet als Satzes und des Lanndes zu Oesterreich recht ist und als der egenant Satzbrief begriffen hat In solicher weise ob yemant herfuer kêm der zu denselben Guetern als nahenter erb wêr oder nehenter das der des an seinen rechten unengolten belib durch unser pet und dinst willen das wellen wir umb ew und die ewrn verdienen wie wir suellen und vermuegen Besigelt mit der vorgenanten Stat ze Wienn klainem aufgedrukchtem Insigel. Geben ze Wienn an Unser Frawn Abennd als si geporn ward Anno etc. LXXXX sexto.

Source Fulltext: Peter Peusquens