Wir Johannis von Kranperg zue den zeiten Techannt und das Capitl gemain des Tuems datz Allerheiligen Tuemkirchen datz sannd Stephann zue Wienn, vergechen fuer uns und fuer all unser nachchoemen und tuen chuend offennleich mit dem brief umb die fuenf phunt wienner phenning geltes Purkchrechts die zue Maister Fridreichs seligen Jartag gehoert habent die man von uns abgeledigt und geloest hat ab Ulreichs haws des Wollspergers gelegen vor der Heiligchreutzerhof zue Wienn zenaechst Hannsen haws des Zeisen des fleyschhakcher umb viertzig phunt wienner phenning die wir mit anderm gelt gelegt haben an das haws das weilent der Gaemnikcher ge-wesen ist mit dem vordern tail in der Suenigerstrazz zue Wienn zenaechst dem haws das weilnt Maister Pauln des Glaser gewesen ist und stoezzet mit dem hindern tail in die Weichenpurkch das wir mit gutem willen und mit wolbedachtem muet zue der zeit da wir es wol getuen moechten, und mit hannden der Erbern weisen Pauln des Wuerffels zue den zeiten puergermaister und des Rats gemain der Stat zue Wienn die egenanten fuenf phunt gelts auf demselben haws zue dem vorgenanten ewigen Jartag gemacht und verschriben habent Jaerleich dartzue ze raichen und ze dienen als Purkchrechts und der Stat zu Wienn recht ist. Mit urchuend des briefs. Besigelten mit unserm aufgedrukchtem Secret und mit der Stat GruentInsigel zue Wienn, das der Rat der Stat zu Wienn durch unser fleizzigen pet willen der vorgeschriben sach auf den brief gedrukcht hat, der geben ist zue Wienn Nach Christes gepuerd dreutzehenhuendert Jar, darnach in dem Syben und Newntzigistem Jare, des nachsten freytags nach sannd Michels tag.

Source Fulltext: Peter Peusquens