Ich Hanns der Rogk ich Hanns der Zirnast ich Maister Hanns von Wiennerher(w)berg, und ich Oswalt der Pauch die zeit all hier des Rats der Stat zue Wienn. Wir vergechen und tuen chuend offenleich mit dem brief, daz fuer den Rat der egenanten Stat zue Wienn choemen, Hanns der Zinkg an ainem tail, und Niclas der Schêrmitzer an dem andern tail, und chriegten miteinander von des paws wegen daz weilnt in dem Chamerhof an des vorgenanten Niclas des Schêrmitzer mawr gestanden waer, und daran der egenant Zinkg noch etwas pawen wolt als die march zaigent da daz alt paw hin gereicht hiet, und chriegten darnach darumb vor unser als lang untz das Si den gantzen Rat unverschaidenleich paten das Si In zwen oder meniger auz In gêben darauf ze be-schawern. Des gab der Rat uns vorgenanten vier In darauf ze beschawern, und haben auch wir des vorgenanten Schêrmitzêr mawr und daz paw in dem chamerhof aigenleichen beschawt und uns mit guter chuentschafft und gewizzen ervarn und darnach In ein recht gesprochen dabey Si fuer-baz vor allem chrieg beleiben sullen Also das der vorgenant Hanns der Zinkg an dieselb mawr gepawen mag in der hoech als die alten march zaigent wil er aber in dieselb mawr Trêmen oder ander ichts pawn des hat er nicht recht ze tuen nuer also daz er an dieselb mawr ein andrew mawr gemawrn mag in der hoech als die alten march zaygent und mag darein und darauf ge-trêmen und gepawen waz er wil an gevêr vor aller irrueng Und darnach choemen wir wider fuer den Rat und sagten unser chuentschafft zue dem rechten als vorgeschriben stet. Und darueber so geben wir von geschêfft und gehaizz des vorgenanten Rates In den brief zue einem waren urchund und getzeug der sach versigilten mit unsern anhanguenden Insigiln. Der brief ist geben zue Wienn. Nach Christes gepuerd. Drewtzehenhuendert Jar, darnach in dem Syben und Newntzigistem Jare, des nachsten phintztags nach sand Gilgen tag.

Source Fulltext: Peter Peusquens