ICh Ortolf der Chraechsner und ich Margret sein hausvrowe. wir veriehen und tuen chunt allen den die disen brief lesent oder horent lesen. daz wir uns und unser erben unverschaidenlich gesatzt haben fur vron Margreten Hainreichs witib dez Mogan dem Got genade und fur vron Wenteln Uolreichs witiben des Nagels bruoder. dem auch got genade und fur ir erben. hern Seyfriden dem Minnganch und seiner hausvrowen vron Katreyn und allen irn erben. uber zwai drittail dez weingarten der da leit ze Grintzingen und haizzet der Scherge dez dreu viertail sint. den der egenant her Seifrit der Minnganch und sein hausvrowe vro Katrey und ir erben gechauft habent von den egenanten zwain vrowen vron Margreten Hainreichs witiben des Mogan und vron Wenteln Uolreichs witiben dez Nagels bruoder. und von vron Jeuten Echartes witiben under den Lauben dem auch got genade und von irn erben gechauft habent. alz si besunderlich brief und insigil dar uber habent. zu rechtem gewer und scherm fur alle ansprach. alz perchrechtes recht ist und des Landes recht ze Oesterreich. Wer aber. daz her Seifrit der Minnganch und sein hausvrowe vro Katrey und ir erben mit recht an den vorgenanten zwain drittailn dez egenanten weingarten dehainen chrieg oder ansprach gewunnen von wem daz waer. daz suln wir in an allen irn schaden allez auz richten und suln auch si daz haben auf allem unserm guet daz wir haben in dem Lande ze Oesterreich. und geben in dar uber disen brief zu einem urchunde versigilt mit unserm insigil. und mit hern Hagen insigil von Spilberch zu den zeiten Juden Richter ze Wienne und mit hern Jacobs insigil dez Maeserleins. die diser sach gezeuge sint mit irn insigiln. Diser brief ist geben ze Wienne nach Christes gebuert dreuzehen hundert jar dar nach in dem ainen und dreizgisten iar an sand Sixtes tag.

Source Fulltext: Peter Peusquens