Ich Rudolf und ich Ludweig geprueder von Tirna Wir vergehen fuer uns und fuer all unser erben und tun kund allen den die den brief lesend oder horent lesen die nu lebent oder hernach kunftich sind, das wir mit guetem willen mit wolbedachtem muet zu der zeit do wir es wol getuen mochtten, Rechtt und redleich geben haben und geben auch mit dem brief unserm diener Chuenraten dem Poppenperger und seinen erben, unsern weingarten gelegen in dem Scheibligen hard des ein halbs jeuch ist zenachst Hannsen akcher des Strobels von sand Ulreich. Doman alle jar von dient der purger Spital vor Kêrnêr tor ze Wienn, andertthalb emmer weins ze perkrecht und drey phening ze voitrecht und nicht mer Also das der vorgenante Chunrat der Poppenperger und sein erben sullen fuerbaz denselben weingarten mit allen den nuetzen und rechten als wir In in perkrechts gwer herpracht haben ledichleich und freileich haben und allen iren frumen damit schaffen verkawffen versetzen und schaffen machen und geben wem Si wellen und alles daz, damit tuen und wanndeln daz In allerpest fuegt oder wol gevelt an allen chrieg und irrsal. Und darueber so geben wir fuer uns und fuer all unser erben In den brief ze einem waren urkund der sach versigilten mit unsern paiden anhangunden insigiln, Der geben ist ze Wienn Nach Kristi gepuerd Drewtzehenhundert jar darnach in dem Achtt und Newntzgistem jar an sand Plêsen tag.

Source Fulltext: Peter Peusquens