Wir Wilhelm und Albrecht vettern von gots gnaden Hertzogen ze Oesterreich ze Steyr ze Kêrnden und ze Krain Graven ze Tirol etc. Embieten den Edeln unsern lieben, getrewn Allen Graven Herren Rittern und Knechten, allen Phlegern, Purggraven, Richtern, Mauttern, Zoellner, Buergern, und allen andern unsern Amptlaeuten undertanen und getrewn, den der brief getzaigt wirt, unser gnad und alles guet. Wir lassen ew wissen, daz wir auf nu, den nachst vergangen Sant Anthonien tag zu Lewben sein gewesen, und haben da ainen tag gehabt mit dem Erwirdigen, unserm sundêrn lieben frewnd..dem Ertzbischoff von Saltzburg da sind fuer uns und unser bayder Rête koemen, unser lieben getrewn, unser Buerger von Wienn, und awz andern unsern Stetten, und haben uns fuerbracht, und beweiset, mit gueten urkunden und briefen von unsern vorvodern sêligen, umb die ungewondlichen Strazzen, die durch unser Land, mit Gesten gepawt werdent, mit ir kauf-manschafft, und besunder die Strazzen, uber die Zeirek, ueber den Krêwtzperg und ueber den Kêtzperg hinIn gen Venedi, und herawz, daz wir des, an unsern Aempten, Mautten, und Zoellen, grozzen schaden nemen und auch allen unsern Stetten, und Kauflaueten verderbenlich Schêden pringen. Davon gebieten wir ew allen, und auch ewêr yeklichem besunder, und mainen gar ernstlich, wa ew unser Bott zaiger dits briefs zaig, auf soeliche kaufmanschafft, oder wa ir selber darauf koemet, es sey auf unsern, oder unserr undertanen gebieten, oder guetern, und die, dieselben verpotten Strazzen gefuert werde, daz ir, die anvallet, und verhefftet zu unsern handen, und des nicht lasset. Wan das also gêntzlich unser maynung ist. Geben ze Wienn an Eritag nach unserr frawn tag ze Liechtmezze Anno domini Millesimo Trecentesimo Nonagesimo Octavo. d(omini) d(uces) per d(ominum) B(ertholdum), Fr(isingensem) ep(iscopu)m, cancellarium

Source Fulltext: Peter Peusquens