Wir Leupolt von gots gnaden Hertzog ze Oesterreich ze Steyr ze Kêrnden und ze Krain Graf ze Tyrol etc. Tun kunt, umb das zuhaus das vor an unser haus ze Wienn stoesset das des Gewkramers gewesen ist, gelegen gegen dem Kyenmarkht daz wir dasselb zuhaus unserm getrewn Hannsen dem Staindel unserm klaynen Schenkhen durch seiner getrewr dienst willen, die er uns getan hat, und noch tuen sol gegeben haben und geben ouch wissentlich mit dem briefe, In solicher mass, daz er allen seinen frumen damit schaffen mag mit verkowffen, versetzen, oder in ander weg nach seinem willen. Davon bitten wir die erbern weisen unser besunderlieben und getrewn..den Burgermeister..den Rate und die burger gemeinlich der Stat ze Wienn daz Sy den egenanten unsern Schenkhen des vorgenanten zuhauses an nutz und gewer setzen, und In auch dabey vestiklich halten und schirmen, wan Sy daran gentzlich unsern willen tuend. Mit urkund ditz briefs. Geben ze Ensisheim an Montag vor sand Gallen tag Nach Christs geburde Drewtzehen hundert Jar darnach in dem Newn und Newntzegistem Jare. dominus dux per se ipsum.

Source Fulltext: Peter Peusquens