Wir Pawl der Wurffel zu den zeyten Burgermayster und der Rat gemayn der Stat ze Wienn . Vergehen fuer uns und fuer all unser nachkomen und Tun kunt offenleich mit dem brif umb die besunder Gyr und andacht so der erber man Pawl der Holtzchewffel zu unserm Spytal gehabt hat das er den duerftigen daselbs sein haws und was darzu gehort gelegen an dem kynmarkcht ze Wienn zenechst dem haws das weylent Andres des Hutstokchs gewesen ist umb mal und umb pad und ander notduerfft Irs leybs geschafft hat und das er seinen weingarten gelegen auf der Chalcgrub mitsambt dem weingarten genant die Gugl der darzu gehort des alles funf achtayl sind ze hilff geschafft hat der Ewigen Mess die Herman Haynreichs des Statschreyber sun den bayden Got gnad In dem egenantem unserm Spytal gestifft als des egenanten Holtzchewffels geschefftbrif sagt den er darumb geben hat und umb all ander stukch punt und artikel die in demselben seinem geschefftbrif begriffen sind haben wir sein begir und andacht angesehen und das haylberig ist gotes dienst zemeren und haben uns gegen Im und gegen seinen geschefft lewten Ulreichen dem Herwarten unserm Statschreyber und Hannsen dem Mosprunnêr unserm mitpurgêr den er nach des vorgenanten seins geschefft brifs sag sein geschefft auszerichten und zevolfurn enpholchen hat mit unsern trewn angevêr verlubt und verpunden und verpinden auch uns gegen Im mit dem brif, das wir das egenant geschefft mit allen den stukchen die von wart zu Wart darinn geschriben sind gentzleich halden wellen und selber nicht dawider tun nach nymant andern gestatten wellen dawider zetuen Alsverr er desselben geschêffs recht hat. Mit urkund ditz brifs den wir In daruber geben mit der vorgenanten Stat ze Wienn klaynem anhangundem Insigiln der geben ist ze Wienn nach kristes gepurd viertzehenhundert Jar darnach in dem andern Jar des nachsten phintztags nach sand Jorgen tag.

Source Fulltext: Peter Peusquens