Ich Haynreich der Verber und Ich Mertt der Hawsleytter die zeyt bayd des Rats der Stat ze Wienn vergehen und Tun kunt offenleich mit dem brif das fur den Rat der egenanten Stat ze wienn kamen Chunrat von Hohenfels an stat frawn Margreten von Noesen die man nennet die Siben-burgerinn an ainem tayl und Jorig der Sneyder und fraw Margret sein hawsfraw an dem andern tayl und kriegten miteinander von der zwayr hewser wegen gelegen nebeneinander In der kernerstrazz ze Wien umb ein Grûeb eins privets die zu denselben Irn zwayn hewsern gehoret, wenn demselben privet ze pawn und ze machen durfft geschech wievil yder tayl geltes darzu geben solt. Und kriegten darnach darumb vor unser alslang, untz das sy den gantzen Rat unver-schaydenleich paten das sy In zwen aus In geben darauf zepeschawêrn, und darnach In ein recht zesprechen dabey sy furbas vor allem krieg beleyben wolten. Des gab der Rat uns vorgenanten zwen aus In darauf zepeschawern und haben auch wir die egenanten hewser und das privet aygenleich beschawt und uns mit guter chuntschafft und gewissen ervarn und darnach ein recht gesprochen dabey sy furbas vor allem krieg beleyben sullen Also swas an dem vorgenanten privet oder der Grueb zepawn oder zemachen ist oder furbas durfft geschicht Da sol der egenanten SybenburgerInn haws aynen phenning darzu geben und des vorgenanten Jorgen des Sneyder frawn Margreten seiner hawsfrawn haws zwen phenning alsofft des durfft geschicht an alles gevêr Und darnach kamen wir wider fur den Rat und sagten da unser chuntschafft zu dem rechten als wir zerecht solten Und daruber ze einem warn offem urkund so geben wir von geschefft und gehays des obgenanten Rats allen den die die obgenanten zway hewser innehabent und besitzent den brif versigilten mit unsern bayden anhangunden Insigiln. Der brif ist geben ze Wienn nach k(r)istes gepurd viertzehenhundert Jar darnach in dem andern Jar des nachsten phintztags nach sand Erasms tag.

Source Fulltext: Peter Peusquens