Ich Jacob der Velsperger von Lô und Margret sein hausvrowe. Wir vergehen und tuen chunt allen den die disen brief lesent oder hoerent lesen die nu lebent und hernach chuenftich sint. Daz wir mit unser erben guten willen und gunst mit verdachtem muet und mit gesampter hant zu der zeit do wir iz wol getun mochten . und mit unsers Perchmaisters hant Seifrides von Obern Suefringen . zu den zeiten amptman des erbern herren von Wolfkerdorf. Verchauft haben einen weingarten der da leit ze Chlaitzingen dez ein halbes Jeuch und ein achtail ist . und leit zenaehst der Teutschen herren weingart . do man alle iar von dient Neuntzehenthalben wienner phenninge fuer perchrecht und fuer voitrecht und nicht mer . Den selben weingarten haben wir recht und redleich verchauft und geben mit allem dem nutz und recht alz wir in Jn perchrechtes gewer her pracht haben . umb fuenftzehen march silbers ie zwen und sibentzich grozzer pehemmischer phenninge fuer ein iegleich march . dez wir recht und redleichen gewert sein . dem erbern manne hern Pylgreim dez Roten hern Marichartes sun dem got genade . und seiner hausvrowen vron Agnesen und allen irn erben fuerbaz ledichleichen und vreileichen ze haben und allen irn frumen da mit ze schaffen . verchauffen versetzen und geben swem si wellen an allen irresal. Und dar uber durch pezzer sicherhait so setzen wir uns . ich Jacob der Velsperger und ich Margret sein hausvrowe . unverschaidenleich mit sampt allen unsern erben . uber den vorgesprochen weingarten . dem egenanten hern Pylgreimen und seiner hausvrowen vron Agnesen und allen irn erben zu rechtem gewer und scherm fuer alle ansprach alz perchrechtes recht ist und dez Landez recht ze Oesterreich. Waer aber daz si mit recht an dem vorgenanten weingarten dehainen Chriege oder ansprach gewunnen von wem daz waer waz si dez schaden nement . daz sulln wir in alles aus richten an alle ir mue und an allen irn schaden. Und suln auch si daz haben auf uns und auf allem unserm guet daz wir haben in dem Lande ze Oesterreich . wir sein lebentich oder tode. Und daz diser chauf fuerbaz also staet und unzerprochen beleibe . und wand unser Perchmaister Seyfrit von Obern Sueffringen selber nicht aigens Insigils hat . da von so geben wir ich Jacob der Velsperger und ich Margret sein hausvrowe dem uns und fuer den egenanten unsern Perchmaister dem vorgenanten hern Pylgreim und seiner hausvrowen vron Agnesen und irn erben disen brief zu einem offen urchuende und zu einem waren gezeuge und zu einer ewigen vestnunge diser sache versigilt mit unserm Insigil . und mit hern Hainreichs Insigil auf der Seul . und mit hern Perichtoldes Insigil dez Schuetzenmaister . die diser sach gezeuge sint mit irn Insigiln . under ander frum Leut genuech den diseu sache wol chunt ist . Diser brief ist geben ze Wienne nach Christes gepurt dreutzehen hundert iar in dem dreu und dreizgisten iar dar nach dez naehsten Eritages vor Mitter vasten.

Source Fulltext: Peter Peusquens