Ich Peter hern Wisents sun dez chramer dem got gnad und Ich Gerdraut sein hausvrow vergehen allen den die disen brief lesent oder horent lesen die nu lebent oder hernach chunftig sint. daz wir mit unserr erben guten willen und gunst mit verdachtem muet mit gesampter hant und ze der zeit da wir ez wol getun mochten und auch mit unsers Gruntherren hant dez erbern Ritters hern Jansen dez Greyfen bey unserr vrowen auf der Steten ze Wienn Recht und Redleich verchauft haben dem erbern Manne hern Chunraten dem Wiltwercher burger ze Wienn und sein erben zwelf phunt wienner phenning geltez Ewigez Purchrechtz auf unserm haus daz da leit gegen hern Ottenhaym Capelln uber an dem Eche daz weyln hern Hainreichs dez Baltrams gewesen ist da von man diennt alle jar ze Gruntrecht sechtzehen wienner phenning dem vorgenanten hern Jansen dem Greyfen und nicht mer. Die selben zwelf phunt geltez hab wir im geben mit alle dem recht als purchrechtz recht ist um hundert phunt wienner phenning und um dreutzehen phunt der wir gantz und gar gewert sein. und ist auch daz, daz erst purchrecht nach dem Gruntrecht daz wir im dienn schullen ze dreyn zeiten in dem jar als purchrechz recht ist an sand Michels tag vier phunt ze weihnachten vier phunt und an sand Jorgen tag vier phunt . und durch bezzer sicherheit so setze wir uns Ich vorgenanter Peter und Ich Gerdraut sein hausvrow unverschaidenlichen mit sampt unsern Erben dem vorgenanten Chunraden dem Wiltwercher und sein Erben uber die vorgenanten zwelf phunt geltez ze rechtem gewer und scherm fuer allen irsal und ansprach als ewigez purchrechtz recht ist und der Stat recht ze Wienn . und geben im daruber disen brief ze einem offen urchuende und ze einem waren gezeug diser sache versigelt mit unserm Ingesigel und mit dez vorgenanten hern Jansen dez Greyffen Ingesigel unsers Gruntherren der diser sache gezeug ist mit sampt seinem Ingesigel. Diser brief ist geben ze Wienn nach Christes burch (burth, geburt) dreutzehen hundert jar darnach in dem dreu und dreyzigisten jar dez nehsten sampstagez nach sand Johannes tag ze den Sunwenden.

Source Fulltext: Peter Peusquens