Ich Peter der Angerveldêr, zu den zeiten Statrichtêr ze Wienn, Vergich offenleich mit dem brief, das fuer mich kom in die purgerschrann ze Wienn, do ich saz an offem gericht, Ott Murbetzel, und klagt mit vorsprechen, das Im Jacob Hunthoch, Invêll und Irrung têt, an seinem und seins Enykchel, Wilhalms des Hannsgrafen, haws und, wachsglet, gelegen in der hindern Pekchenstrazz ze Wienn, zenagst Niclas Oswalts haws, und klagt darumb alsverr, untz das der durchlêuchtig fuerst, Hertzog Albrecht ze Osterreich etc. mein genêdiger herr, mir gepot, und ernstleich mit mir schueff, ich solt dem vorgenanten Jacoben Hunthoch ze wizzen tuen, das er fuer mich und fuer offens gericht kêm, Swas sein antwurtt oder widerred darynn wêr und geschêch darnach was ein recht wêr, des tat ich Im ze wizzen, als ich zerecht solt, und nach demselben zewizzentuen, kom der vorgenant Ott Murbetzel wider fuer mich do ich saz an offem gericht, aber der egenant Jacob Hunthoch, noch ander nyemant von seinen wegen, komen nicht, Do ward gefragt was recht waer, do geviel mit vrag und mit urtail, ez solten die vorgenanten Ott Murbetzel, und Wilhalm Hannsgraf sein Enykchel, mit sambt dem egenanten irem haws und wachsglet, beruebt ledig und frey sein, und solten dem obgenanten Jacob Hunthoch von desselben hawses und wachsglets wegen fuerbaz nicht antwurtten, und solt ich In des mein urkund geben, und solten Si mir darumb mein recht geben, daz habent Si getan, Und des ze urkund gib ich In den brief, versigilten mit meinem insigil. Der geben ist ze Wienn, Nach Kristi gepurt, viertzehenhundert Jar, darnach in dem dritten Jar, des des nagsten Montags, nach sand Veyts Tag.

Source Fulltext: Peter Peusquens