Ich Margret Hainreichs witib des Schetzleins Vergich offenleich mit dem brief das mich der erber man her Niclas der Valich der pfeilsnytzer dietzeit des Rats der Stat ze Wienn an stat seins Enn Stephans der zu seinen beschaiden Jaren noch nicht choemen ist, Hannsen sun des Trawtmans dem got genad verrichtet und gewert hat fuenftzig phunt wienner phenning die ich dem egenanten Hainreichen sêligen meinem wirt ze Haymstewr pracht han und sag auch ich den egenanten Niclasen von Valich und Stephann seinen Enn, und Ir erben, der vorgenanten fuenftzig phunt phenning gêntzleich ledig und los, und vertzeich auch mich, gegen In, aller der erbgueter die der egenant Schêtzel mein wirt hinder Im lassen hat wie die genant sind. Also, das ich noch mein erben furbas, darauf nymermer chain ansprach noch vordrung haben noch gewinnen noch chains rechtens darauf gehen sullen In dhain weg Ausgenomen das haws vor werdertor das von dem egenantem meinem wirt mein morgengab ist nach meins briefs sag Das sol ich ze leibgeding haben als morgengab und der Stat ze Wienn recht ist und nach meinem tod, sol es gevallen dohin do es denn ze recht erben und gevallen sol, an allen chrieg. Und wannd ich obgenante Margret selber aygens Insigel nicht han daruber so gib ich fuer mich und fuer all mein erben In den brief zu einem warn urkunt der sach versigelten mit der zwair erbern mann Insigel. Hern Pilgreims des Dryschler, dietzeit des Rats der Stat ze Wienn und Hainreichs des Scheppachs burger daselbs, die ich des fleissichleich gepeten han das Si der sach getzeugen sind mit Iren anhangunden Insigeln In an schaden und verpind mich auch mit meinen trewn an gever under Iren Insigeln alles das stêt zehaben und ze laisten das vor an dem brief geschriben stet Der geben ist ze Wienn Nach Christi gepurd viertzehenhundert Jar darnach In dem dritten Jar des nêchsten Mitichens nach sand Johanns tag ze Sunbenden.

Source Fulltext: Peter Peusquens