Ich Chunrat der Vorlawf zue den zeyten Burgermaister ze Wienn und Ich Mertt der Hawsleyttêr die zeyt kamrêr daselbs Wir vergehen fuer uns und fuer all unser erben und tun kund offenleich mit dem brif das wir unverschaidenleich gelten sullen Frydlein dem Juden Smoyels sun von der Newnstat und seinen erben Hundert phunt und zehen phunt wienner phenning der wir Sy oder wer den brif mit Irm guetleichem willen ynnehat und uns damit mant, richten und wern sullen zue dem vaschangtag der schirist kûmpt Tun wir des nicht so get furbas gesuch darauf auf ein ygleich phunt zwen wienner phenning all wachen Sy sullen auch haubtgut und schaden haben auf uns unverschaidenleich und auf allem unserm guet das wir haben In dem lannde ze Osterreich oder wo wir es haben davon In denne der lanndes fuerst oder wer seinen gewalt hat an klag an furbot und gericht phant antwurten sullen wo Sy darauf zaigent wann die vorgenanten Juden Irs gelts nach der obgenanten frist nicht lennger entpern wellent Alsverr das Sy haubtguts und schadens davon gantz und gar verrichtet und gewert werden Wir sullen Sy auch umb haubtgut noch umb schaden weder hintz hof noch an chain gewaltigew hant noch alswohin nyndert schaffen nur das wir Sy selber Irs guts haubtguts und schadens richten und wern sullen als vorgeschriben stet Und daruber ze einem warn offem urkund geben wir In den brif versigilten mit unser bayder anhan-gunden Insigiln der geben ist ze Wienn nach Kristes geburde viertzehenhundert jar darnach in dem drytten jar des nachsten vreytags vor sand Kathrein tag.

Source Fulltext: Peter Peusquens; siehe auch: Regesten zur Geschichte der Juden in Österreich Bd. 4, S. 278f