Ich Mertt der Hawsleitter die zeit des Aussern Rats der Stat ze Wienn. Und ich Kathrey sein hawsfraw Wir vergehen und tuen kund allen den die den brif lesent oder horent lesen das wir mit gutem willen mit verdachtem muet und mit gesambter hant zue der zeit do wie es wol getuen mochten und mit hannden hern Chunraten des Vorlauffs zue den zeiten Purgermaister und des Rats gemayn der Stat ze Wienn, Recht und redleich verchaufft und gegeben haben Achthalb phunt wienner phenning geltes purkchrechts auf unserm haws gelegen in der Kernerstrazz ze Wienn zenêchst Jacobs haws des Rûswurm, umb Sechtzig phunt wienner phenning der wir gantz und gar verrichtet und gewert sein Der erbern frawn, frawn Eysaln Seyfrids seligen witib des Fuchsleins und Irn erben furbas ledichleichen und freileichen zehaben und allen Iren frumen damit zeschaffen verchauffen versetzen und geben wem sy wellen an allen irrsal Also mit ausgenomen worten das wir und alle die daz vorgenant unser haws Innehabent und besitzent In die egenanten achthalb phunt gelts purkchrechts furbas allew Jar davon raihen und dynen sullen ze dryn zeiten Im Jar an sand Jorgen tag an sand Michels tag und ze Weichnachten ze einem igleichem dinsttag zway phunt und vier schilling wienner muenzz ze purkchrecht, und nicht mer Es ist auch dasselb purkchrecht wider abzechauffen wenn wir unser erben oder nachkomen daz getuen muegen oder wellen ze aintzigen oder miteinander ye ain phunt gelts umb acht phunt wienner phenning ze allen krig. Und wenn der dinst versezzen wirt so ist denn vor dem Statrichter in der purgêr Schrann ze Wienn auf das vargenant haws umb zwispild zeklagen ze virtzêhen têgen als umb versezzens purkchrechts recht ist und der Stat recht ze Wienn Wir sein auch mitsambt unsern erben unverschaidenleich der egenanten guelt auf dem vorgenanten haws Ir recht gewern und scherm fur alle ansprach als purkchrechts recht ist und der Stat recht ze Wienn. Und was In mit recht daran abget das sullen Sy haben auf uns unverschaidenleich und auf allem unserm gût daz wir haben In dem lannde ze Oesterreich oder wo wir es haben wir sein lebentig oder tod. Und darueber ze einem warn offem urkund und getzeug geben wir In den brif versigilten mit unserm Insigil und mit der Stat GruntInsigil ze Wienn das der Rat der Stat daselbs ze einer warn getzeugnuezz der vorgeschriben sach durch meiner vleizzigen pet willen an den brif gehangen hat Der geben ist ze Wienn Nach Kristi gepuerde virtzehenhundert Jar darnach in dem virden Jar des nachsten Erytags vor sand Mertten tag.

Source Fulltext: Peter Peusquens