Ich Gatrey Rudgers Tochter vergich mit disem prief daz ich nach meiner besten vreund Rat verchauft hab dem Erbern Manne Chunraden dem wiltwercher purger ze wienn und sein Erben ein viertail eines paumgarten daz da leit in dem paumgarten der da haizzet der Juncher da von man im emoln gedient hat alle jar sechtzig wienner phenning ewiges purchre(ch)t um vier phunt phenning der ich gantz und gar gewert bin und hab auch um die selben vier phunt chauft ein weingertel daz da leit in den cwerch lussen ze nahst otten weingarten dez heller da von man alle jar dient dem spital ze wienn achthalben und dreizzig phenning ze Rechtem purchrechte und nicht mer. und durch besser sicherhait setze ich im daz selbe weingertel und Herrand den Refen und Wernhard den Risen fuer daz egenante paumgertel ze rechtem gewer und ze scherm und fuer alle ansprach. und wan ich selbe(r) nicht aygens ingesigels han so gieb ich im disem prief versigelt mit dez Spitals ingesigel. Datum anno domini Millesimo Trecentesimo Trecesimo quarto proxima sexta feria post Lucie virginis.

Source Fulltext: Peter Peusquens