Ich. Jacob der Chrannest. hern Pylgreimes Aydem des Mundoffen purger ze wienne. und ich Perchte sein hausvrowe. Wir veriehen. und Tun chunt allen den die disen prief lesent oder horent lesen. die nu lebent und her nach chunftich sint. daz wir mit unserr Erben gutem gutem (sic!) willen und gunst. mit verdachtem mute und mit gesampter hant. nach unserr pesten vreunde rat. zu der zeit da wir ez wol getun mochten. und auch mit unsers Perchherren hant. des Erbern Ritters hern Chunrates des Hubmaisters in Oesterriche. Recht und redlichen verchauft haben. unsers Rechten anerstorben Erbegutes. Einen weingarten der da leit. an dem Newenperge. ze naechst meines pruder weingarten. hern Dietreiches des Chrannestes. des Eyn jeuch ist. da von man dient alle jar. an unserr Vrowen Tage der Lyechtmesse fur perchrechte. fur voytrecht und fur zehenten dreizzich wienner phenninge. und nicht mer. mit allem dem nutzze und rechte. als unser vodern. und auch wir den selben weingarten unversprochenlichen in perchrechtes gewer her pracht haben. umb zway und achtzzich phunt phenninge wienner Muntze. der wir gar und gentzlichen verricht und gewert sein. den beschaiden Leuten. Fridreichen pei dem Stege. vor Wydemertor und vron Reytzzen. seiner hausvrowen. und Maister Fridreichen dem Choche. seinem swager. und vron Gedrauten seiner hausvrowen. und allen iren Erben. furbaz Ledichlichen und vreilichen ze haben. und allen iren frumen. da mit ze schaffen. verchauffen. versetzzen. und geben swem seu wellen. als in das wol chome und fuge. an allen irresal. Und durch pezzer sicherhait. so setzzen wir uns. ich vorgenanter. Jacob der Chrannester. und ich Perchte sein hausvrowe. unverschaidenlichen mit sampt unsern Erben. dem egenanten Fridrichen bei dem stege vor wydemertor. und vron Reytzzen seiner hausvrowen. und Maister Fridreichen dem Choche. seinem swager. und vron Gedrauten. seiner hausvrowen und allen iren Erben uber den vorgenanten weingarten. ze rechtem gewer und scherm fur alle ansprach. als Perchrechtes recht ist und des Landes Rechte ze Oesterriche. also mit auzgenomener Rede. ob daz waer. daz mir und meinen Erben. oder in und iren Erbe. dehain chrieg auf erstunde. an dem selben weingarten. umb das vorgenant Perchrecht. umb das voytrecht. oder umb den zehenten von welher lay sache das waer. so schullen seu. oder ir Erben. mir oder meinen Erben. den prief her wider antwurten und geben. den ich dar uber gehabt han. da mit Ez mein vater und auch ich. in unser gewalt pracht haben. da vron Jeutten der Gotesvelderinne. und Jansen ires sunes Insigele. anhangent. von den die selben aygenschaft. und die Rechte gechauft und her chomen sint. Taeten seu dez nicht. oder daz seu oder ir Erben den selben prief verlueren. so sein wir und unser Erben furbaz des selben schermes. uber das vorgenante Perchrecht. und voytrecht. und zehenten. aller dinge ledig und vrei. Und swas in. oder iren Erben. furbaz dar uber. an dem selben weingarten. und an den Rechten. die wir in. dar auf verschriben haben. mit Rechte abeget. das schullen seu haben unverschaidenlichen. auf uns. und auf allem unserm Gut. das wir haben in dem Lande ze Oesterriche. wir sein Lebendig oder Tode. Und daz der chauf und die rede. furbaz also staete sei. und untzebrochen beleibe. dar uber so geben wir in disen prief zu einem offen urchunde und gezeuge. und zu einer Ewigen vestnunge versigelten mit unserm insigel. und mit des vorgenanten unsers perchherren. insigel. hern Chunrates des Hubmaisters in Oesterrich und mit hern Jacobs insigel. des Maeserleins. die diser sache gezeuge sint mit iren insigeln. Und sint auch dez gezeuge her Hainreich der Chuchenmaister. her Chunrat der Aetzkestorfer. Hainrich der Zuchswert. Leupolt bei dem Valtor. Georg des hubmaisters schreiber. Rueger der Pekche. Haertel der Rostauscher. und ander Erber Leute genuech. Diser prief ist geben ze wienne. nach Christes gepurt dreutzehen hundert jar. dar nach in dem fumf und dreizzigistem jar des suntages ze Mitter vasten.

Source Fulltext: Peter Peusquens